Çalakîyanê 25ê Teşrîna Peyêne Roja Têkoşînê Vera Şîdetê Serê Cinîyan de Tirkîya û Vakurê Kurdîstanî de venga pêro cinîyan ame dayene ke dekewê waran.

Amed de Serekîya Dayîreyê Cinîyan û Xizmetanê Keyeyî yê Şaredarîye kampanyaya bi nameyê ''Qiseyê ma nêqedîya, ma do pîya verê şîdetî de vinderê'' dabî destpêkerdene. Cinîyan derheqê kampanya de vilawekî vila kerdî û derheqê kampanya de agahîyî dayî. 

Îstanbul de Platformê Cinîyan Şîşlî de trafîk  wesayîtan rê qefilna û pankarta ''Têkoşînê ma seba ma yo, ma wazenê têdûşt û azad biciwîyê'' akerde.Cinîyan sloganê sey Jin, jiyan, azadî” vatî û venga pêro cinîyan da ke tewrê rayraşîyayîşê Taksîmî bibê.

Mêrdîn de dewa Kelekî ya Şemrexî de TJA leyî nayî ro. Vervatoxa TJA ya Mêrdînî Hatîce Oncu çalakîye de vat ke hêzê çareserîye Îmrali de yo û seba şiknayîşê tecrîdî ganî cinîyî vejîyê waran. Wekîla DEM Partî Bêrîtane Guneş zî çalakîye de qisey kerd.

Şirnex û qezayanê ci Silopiya, Hezex û Cizîrî de TJA derheqê şîdetê vera cinîyan de xebatî kerdî.