Hetkara Hemserekanê Îdareyê Xoserî Emîne Osê hêrişê dewleta tirke yê vera Rojawanî, polîtîkayê cîyakerdişî yê dewleta tirke û Sûrîye û vilabîyayîşê vîrusê Korona de ANFyî reyde qisey kerd.

Emîne Osê pare kerd ke dewleta tirke têna hêrişê Rojawanî nê hêrişê pêro destkewteyanê kurdan û Kurdîstanî kena û vat: ''Seba ke kurdî wayîrê statuyêkî nêbê dewleta tirke her çi kena. La gerîlayî zî Heftanîn de Herêmanê Pawitişî yê Medya de xoverdayîşêkê pîlî kenê. Dewleta tirke erdê ma îşxal kena, nê cayanê îşxalkerdeyan de merdiman remnena, cergan ca kena, merdiman rê îşkence û tecawuz kena û demografîya herême vurnena. Rixmo ke nê sûcê pêro bi dokumantan ameyî qeydkerdene hêzê mîyanneteweyî vera dewleta tirke tewir nêgênê. Îşxalê Girê Sipî û Serêkanîyê ra dima dewleta tirke terzê xo yê hêrişkerdişî vurna. Dewleta tirke hînî qirkerdişan kena, merdimanê sivîlan kişena. Hêzê mîyanneteweyî vera nînan zî bêveng ê.

Reyna dewleta tirke ciwananê ma kena ajan û mabênê şaran de fîtne kena. Bi nê hawayî zî herême de alozîyan virazena. Eleqeyê serebûtanê Dêra Zorê zî  bi dewleta tirke esto. Dewleta tirke rayberanê eşîran kişena ke wa şar vajo Îdareyo Xoser nêeşkeno înan bipawo. Ganî şarê ma vera nê planan hîsger bibo, wayîrê ciwananê xo vejîyo."

Emîne Osê da zanayene ke înan herême de vera vîrusê Korona tedbîrê xo girewtî û vat: ''Ma reya verêne tedbîrê xo girewtî, ma sînorî girewtî. La cara herême de krîzêko ekonomîk esto. Hewceyê şarî esto ke bixebito. Coka ma neçare mendî ke tedbîrî tay sist bikerê. Dewleta tirke xîret kerdêne ke nêweşîye herême de vila bikera. Rejîmê Sûrîye zî vat o tedbîranê Korona nêşinasneno. Vîrus teberî ra ameyo herême. Pêro waran de ekîpê ma yê weşîye xebitîyenê. Heta nika 2019 kesî pê vîrusî kewtî û 15 kesî vîrusî ra merdî.

Ganî şarê ma tay çîyanê sey pakî, xebitnayîşê maske, mesafe xo rê bikero kurm.Ganî pêro dezgeh û çapemenîye seba hîşyarkerdişê şarî xîret bikerê. Her çiqas îmkanê ma qîm nêkenê zî ma seba tedbîran û hîşyarkerdişê şarî xebitîyenê.''