Abdullah Ocalan wexto ke Şam û Lubnan de mendêne tim şarê Rojawanî û Sûrîye reyde kombîyayîşî kerdêne. Endamê Akademîya Komelê Demokratîkî Ebdulxenî Osoyî reya verêne serranê 1991î û 1992î de Sûrîye û Lubnan de Abdullah Ocalanî dî. Osoyî derheqê pêvînayîşê xo yê bi Ocalanî de ANF reyde qisey kerd.

Ebdulxenî Osoyî ard ziwan ke 33 serr ê ke o tewrê Têkoşînê Azadîye yê Kurdîstanî bi û vat: ''Serra 1991î de Rûstem Cûdî ez berda cayê Ocalanî. Ma pîya şîyî Bekaa. Wexto ke mi Ocalan dî ez bermaya. Ma ey ra hêz û enerjî girewtî.

Serra 1992î de zî ma Şam de yewbînî dîyî. Rayber Apoyî uca de ma rê vat ke çareserîya meseleyan ma yê. Xora ey tim meseleyan ser o rayîrê çareserîyan fikirîyayêne. Rayber Apo o çax tim Şam û Lubnan de mendêne. Têkilîya ey bi şaran weş bîye. Coka komployo mîyanneteweyî vera pêro şaran a.

Pawitişê Ocalanî yê bi 5 cîldan seba meseleyanê Rojhelatê Mîyanênî û Kurdîstanî çareserîyî pêşkêş kerdêne û nê sey rayîrê çareserîye bîyî. Rayber Apo beno ke hetê fîzîkî ra binê tecrîdî de yo la hetê fikr û aqlî ra ma het de yo. Ganî ma Rayberîye baş fam bikerê. Ma nêverdê ke na keda ci bîlasebeb pûç biba. Fikrê ey seba şarê herême firsend ê.

Ne zîndan ney zî tecrîd eşkeno fikranê Rayber Apoyî asteng bikero. Seba wedaritişê tecrîdê vera Rayber Apoyî têkoşînê ma do dewam bikero. Azadîya Ocalanî azadîya pêro şaran a.''