Dewleta perey tirke taxa Xilêlîyê ya Qamişloyê Rojawanî de pê SîHAyan Yusuf Gulo û tornê ci Mazlûm û Muhammed Gulo qetil kerdî. Hîrê şehîdî ewro Goristanê Şehîd Delîl Sarûxanî yê Qamişloyî de bi merasîmêkê biheybetî ameyî definkerdene.

Îdarekarê partîyanê sîyasîyan ê kurd, ereb û suryanîyan, yê Îdareyê Xoserî û Meclîsê Sûrîyeya Demokratîkî (MSD) tewrê cenaza bîyî. Hîrgoşê Sonî ra heta Goristanê Şehîd Delîl Saruxanî rayraşîyayîşêk ame kerdene. Rayraşîyayîş de bi sloganan mesajê pîlkerdişê tekoşînî ameyî dayene û xayînîye û hêrişî ameyî şermezarkerdene.

Goristan de badê rêzgirewtişî Endama Komîteya Hemserekîye ya PYDyî Foza Yusif qisey. Foza Yusifî bale ante têkoşîn û fedakarîya keyeyê Guloyî ser û vat: ''Şehîdî temsîlkarê têkoşînê kurdan û ma rê vanê verê dişmenî de milê xo çewt nêkerê. Dewleta tirke bi hedefgirewtişê welatperweran wazena îradeyê şaran bişikno. Ma Erdoganî rê vanê, şorişê ke pê şehîdan dest pêker do pê şehîdan dewam bikero. Ma nêtersenê. Şima nêeşkenê vera qehremanîye û hêzê şarê ma de vinderê. Ciwanê kurdan do qesasê şehîdan bîgirê û sûcdaran ra hesab bipersê. Xayînîye do biqedîyo û xoverdayîş ser bikewo.''

Dima ra Hemsereka MSDyî Emîne Omer qisey kerd. Omere vat hêrişê vera sîvîlan binkewtişê polîtîkayê rejîmê Tirkîya ramojnenê.

Dayîka Şehîd Mazlûm Guloyî Necah Gulo zî ard ziwan ke kurdî do heta serkewtiş qerardar rayraşîyayîşê şorişî bidomnê û veng da komelê mîyanneteweyî. Necah Gulo vat: ''Şima qey nê hêrişan nêvindarnenê? Ciwan û extîyarî yenê qetilkerdene. Şima bi bêvengîya xo benê hemkerê sûcanê dewleta tirke. Şima se kenê bikerê şima do nêeşkê kurdan biqedinê. Kurdî do tewr peynî de ser bikewê.''

Badê qiseykerdişan şehîdî bi slogan û tîlîlîyan ameyî definkerdene.