PDKyî 16ê kanûna 2021î de Berê Sînorî yê Pêşxabûrî (Sêmalka) qefilnabi û dima zî Berê El Welîdî zî qefilnabi.  Endama Heyetê Pêroyî yê Partîya Yewîya Demokratîke (PYD) Erîfe Bekîr derheqê babete de ANFyî rê qisey kerd.

Erîfe Bekîr vist vîrî ke destpêkê şorişî de Rojawan gêrîyabi binê ablûqa û netîceya îtîfaqî de 2013 de Berê Sêmalka seba hewcedarîyanê şarî amebi akerdene. Erîfe Bekîr vat: ''Nika no ber seba menfaatanê sîyasîyan ame qefilnayene. Berê Sêmalka de selahîyetdaranê Başûrî şarê Rojawanî rê teda kerdêne û ber sey warê îstîxbaratî şuxilnayêne. Hemwelatê Rojawanî key berî ra derbaz bîyêne derheqê înan de tehqîqat ameyêne kerdene. Nêweşî verê berî de ameyêne vindarnayene. Reyna destûr nêameyêne dayene ke kesê ke mîyanê Îdareyê Xoserî de yê nê berî ra derbazê Başûrî bibê.''

Erîfe Bekîr bale ante armancê qefilnayîşê berî ser û vat: ''Armanc no yo ke şarê Rojawanî teng bibo, vera Îdareyê Xoserî wurzo payan ser, koç bikero. Peynê qefilnayîşê nê berî de menfaatê sîyasî estê. Bi nê hawayî 5 mîlyon hemwelatîyê Rojawanî binê tehlukeyî de verdîyayî. Xora Rojawanî ra xeylêk merdiman hêrişan û tedaya dewleta tirke ra koç kerd. Nika Başûr de 1 mîlyon koçberê Rojawanî estê. Pê qefilnayîşê berê sînorî têkilîya nê keyeyan birîyaye.  Berê Sêmalka nefesê Rojawan û Başûrî yo. Hem warê ekonomî de hem zî warê bazirganîye de vera Başûr û Rojawanî teda esta.

Endamanê PYD û Partîya Yewîya Niştimanî ya Kurdîstanî (PYNK) seba newe ra akerdişê berî zaf xîret kerd û ê hê kenê. Îdareyê Xoserî zî seba ney zaf pêvînayîşî kerdî. La selahîyetdarê Başûrî bêveng ê. Berê Sêmalka waştişê Tirkîya ser o ame qefilnayene. Verê ma de tehlukeyêko pîl esto. Ganî kurdî vera hêrişan û teda paştî bidê pê. Ma venga hukmatê Başûrî danê ke wa baş bizano ke kurdî ça de bê Tirkîya do hêrişê uca bikera. Tirkîya wazena komployo ke vera Rojawanî kena, vera Başûrî zî bikera. Wa Başûr pê dafika Tirkîya mexapîyo û berî abikero. Qefilnayîşê Berê Sêmalka zerar dano Başûr û Rojawanî.''