Dewleta tirke û çeteyanê ci qezaya Til Rifatî ya Efrînî de 2ê kanûna 2019î de warê sîvîlan bombarduman kerd û netîceya hêrişî de 8ê înan domanî 10 kesî şehît bîyî û 12 kesî birîndar bîyî. Bi wesîleya serrgêra qirkerdişî çalakîyê protestoyî ameyî kerdene.

Şehba de hetê xeylêk dezgehan ra çalakîyêke ameye organîzekerdene. Rayraşîyayîşo ke taxa Fafînê de dest pê kerd Şehîdgehê Til Rifatî de qedîya. Badê rêzgirewtişî eşkerayîye ameye wendene. Eşkerayîye de ame vatene: ''Domanê ma xeta ma ya sûr a, heqê înan bimbarek ê û goreyê rêxistinanê domanan ê dinya ganî heqê înan nêrê binpaykerdene. Domanê efrînijî verê çimanê dinya de Til Rifat de ameyî qetilkerdene. Rêxistinê heqanê merdiman û meclîsê mîyanneteweyî yê ke qanûnan vejenê û pêkerdişan îmza kenê ganî heqanê merdiman û cuye bipawê.''

Taxa Şêxmeqsûdî ya Helebî de zî wendekaran eşkerayîyêke daye û vat seba ke hêrişê dewleta tirke yê vera sîvîlan û domanan bêrê qedînayene ganî heme rêxistinê huqûqî wezîfeyê xo bîyarî ca.