Dewleta tirke demê peyên de hêrişê xo yê vera Eyn Îsa û Girê Sipî zêdînayî. Fermandaranê QSDyî ra Karker Andokî û Şerwan Murat Minbicî hêrişê dewleta tirke ercnayî.

Karkerî ard ziwan ke ê vera her qeyde hêrişan amadeyê û do heta peynî heqê xo yê xopawitişî bixulnenî û wina dewam kerd: ''Dewleta tirke demê peyênî de hêrişê xo yê vera Eyn Îsa û Girê Sipî zêdînayî. Xora pê nê hêrişan wazenê ke sînoranê waranê ke îşxal kerdî  hîra bikerê. Reyna wazenê herêma mabênê rayîrê mîyanneteweyî yê M4î û herêma Cizîre raqilnê ke îşxalî xorî bikerê. Dewleta tirke tîya şerêkê leşkerî rayra nêbena, vera heme ganîyan qirkerdiş kena. Pê çekanê giranan hêrişê cayê sîvîlan kena. Dewan û keyeyanê sîvîlan ser o bombayan varnena. Rixmê mutabaqatê ke ameyo kerdene dewleta tirke nê waran rê her tewir de hêriş kena la rejîmê Rûsya û Sûrîye ke herême de hêzê înan estê, vera nayî bêveng ê. Dewleta tirka îşxalkere xeylêk cayan de baregehê xo nayî ro. Merkezê En Îsayî rê di km nizdî bîya. Wazena ke baregehanê xo zafêr bikerê. Nika 5-6 nuqtayê înan ê leşkerî estê. Vera nayî Rûsya û Sûrîye tewir ranêmojnenê. Tîya  sere de QSD û şarê kurdî şarê Rojawanî yenê hedefkerdene ke biqedîyê. Ma do heta peynî erd û şarê xo bipawê.''

Şerwanê QSDyî Murat Minbic zî vist vîrî ke 4 serrî yo ke hêrişê îşxalî yê  dewleta tirke yê vera Rojawanî dewam kenê û vat: ''Nê prosesê peyênî de her roje vera Eyn Îsayî hêrişî yenê kerdene. Bi waştişê îşxalî di reyî cehdkerdişê dekewtişî ame kerdene. Rixmo ke ê heme îmkananê xo yê teknîkî semedê îşxalî şuxulnenî şerwanê QSDyî cewabê pêtî danê ci û hêrişê înan şiknenê. Xora dewleta tirke têna vera şerwanan nê hêrişê şarê sîvîlî zî kena. Îşxal zî ci rê qîm nêkeno cayo ke îşxal kena şarî rê îşkence kena. Sey şerwananê QSDyî şarê ma zî vera nê hêrişan xover dano. Şerwanê QSDyî qicê nê şarî yê coka şar heta peynî paştî dano şerwananê xo û semedê pawitişê erdê xo xover dano. Ma sey qicanê nêşarî do heta dalpaya peyêne ya gonîya xo erd û şarê xo bibawê.''