Goreyê zanayîşanê ke çimeyanê herême ra ameyê girewtene, Cûma Nedîm û Bekrî Nedîm ê ke birayê yewbînî yê û Heleb ra yê, dewa Tîltene ya bajarê Babî de hetê çeteyanê rejîmê Enqere ra ameyî remnayene û îşkenceyêko hovane bi ci ame kerdene.

Cerablus ra heta Efrîn, herêma ke hetê dewle Tirkî ra ameya îşxalkerdene, îşkence û kiştişê merdiman êdî rojane qewimîyenê. Ame zanayene, çeteyê ke merkezê Cerablusî ra yê,  di rojî verê cû di birayî kiştî.

Efrîn 18'ê Adare 2018 ra nata hetê dewleta Tirkî ya îşxalkare û çeteyanê ci ra ameya îşxalkerdene. Wextê destpêkerdişê hêrişanê îşxalkarîye ra heta nika bi hawayêko sîstematîk sûcê şerî yenê kerdene. Malê merdimanê herêma Efrînî dest ameyo serronayene, merdimî seba fîdye yenê remnayene, îşkence bi ci yeno kerdene, yenê kiştene û demografîyê herême yeno bedilnayene.

Nê sûcê şerî û pakkerdişê etnîkî yê ke Efrînî yenê kerdene, raporanê dezgehanê mîyanneteweyî de zî ca girewt. Raporê menga Sibate yê Komîsyonê Xoserî yê Sûrîye yê Neteweyê Yewbîyayeyî de, bale antebî ser ke Efrîn de sûcê merdimîye yenê kerdene.