Dimayo ke HTŞyî heme herêmê rojawanê Helebî grûba Nûredîn Zengî ra girewtî Rûsya hemverê nuqteyanê HTŞyî de hêrişî hewayî viraştî. Hemverê pêkewtiş û hêrişanê hewayî de bêvengîya Tirkîya bale ancena.
Dimayo ke grûba çeteyan a Heyet Tehrîr El-Şamî (HTŞ) ke pabesteya Cebhet El Nusra ya xeylî herêmê rojawanê Helebî Nûredîn Zengîyî ra girewtî teyareyanê şerî yê Rûsya tayê herêman de da nuqteyanê HTŞyî ro.
REYA EWILÊNE HERÊMA PÊNÊKEWTIŞÎ YENA PIRODAYENE
Xeylî herêmê sey Daret Îza, Qibtan El Cebîl ke destê grûba Nûredîn Zengî de bi kewtî binê kontrolê HTŞyî. Yeno vatene ke hemeyê grûba Nûredîn Zengî remaya şîya Efrîn. Naye ra dima saetanê şanî de teyareyanê şerî yê Rûsya herêmanê Keferniha, Urm, Alaya 111. ya Atarîbî, Daret Îza û Cermîya El Rehal de hemverê nuqteyanê HTŞyî de hêrişê hewayîyî viraştî. Nê herêmî çarçiwaya Mutabaqatê Astana de sey herêmê pênêkewtişî ameybî îlankerdene. Dimayê îmzakerdişê mutabaqatî ra reya ewilêne hemverê nê herêman de hêrişî virazîyayî.
DEWLETA TIRKÎ BÊVENG A
Rixmê pêkewtişanê mabênê grûban de bêvengîya dewleta Tirkî ya ke “welato garantor” a bale ancena. Bunyeya HTŞyî de grûbê sey El Nusra, Ceyşul Sunne, Cundul Aksa, Lîwa El Heq, Ceyşul Ehrar, Hurras El-Dîn û Ensar El Dîn estê.
Bunyeya “Cepheyê Xelasî yê Neteweyî” de zî grûba Ehrar El Şamî ya ke HTŞyî ra visyabî û grûbê sey Nureddîn Zengi, Feyleq El Şam, Sukur El Şam, Ceyşul Idlîb, Ceyşul Nuxbe, Ceyş El Nasir, Hemzet û Cephe Şerqîye estê.
