Selahîyetdaranê Suryanîyan gefê dewleta Tirkî yê îşxalî û qerarê ancîyayîşê hêzanê Amerîka ANFyî rê ercnayî. Derheqê babete de hemsereka Meclîsê Îdareyê Xoserî yê Vakur û Rojakewtena Sûrîye Sîham Qorîye û Vervatoxê Hêzanê Demokratîkan ê Sûrîye (QSD) Kîno Gabrîyelî ajansê ma rê qisey kerd.

'QSD DO ROLÊ XO YÊ TARÎXKÎYÎ BIDOMNO'

Sîham Qorîye vat ke hetê pozîtîf û negatîfî yên ê qerarê ancîyayîşî estê û wina dewam kerd: “Eke ma hetê ci yê pozîtîfî ra nizd bibê beno ke no qerarê ancîyayîşî bibo wesîleya ancîyayîşê heme hêzanê bînan. Ma veng nêda Amerîka. Hêrişanê Kobanê ser o ê ameyî. Ma hemverê dişmenê hemparî de mucadeleyêko hempar da û Til Hemîs ra heta Reqa xeylî herêmî destê DAÎŞî ra ameyî xelisnayene.”

Sîham Qorîye dewamê qiseykerdişî de nê vatî: “Ma do tîya ra tepîya zî hemverê DAÎŞî û çeteyan de mucadeleyê xo bidomnê. Çi wexto ke hêzê ma perçeyêkê erdanê Sûrîye îşxalî ra xelisnenê dewleta Tirkî tehdîtêk kena. Xora înan Cerablûs, Bab, Ezaz û tewr peynî zî Efrîn îşxal kerd. Nika wazenê ke heta Qamişlo îşxal bikerê. Ma nêvato ke do Amerîka bêro ma bixelisno. Ma sey QSD erdanê Sûrîye kenê azad û seba îşxalî ra xelisnayîşê erdanê Sûrîye mucadele danê. Ma do tîya ra tepîya zî nê rolê xo yê tarîxkîyî bica biyarê.”

'GANÎ NY Û KANY HEMVERÊ HÊRIŞANÊ DEWLETA TIRKÎ DE TEDBÎRAN BIGÎRO'

Hemsereka Meclîsê Îdareyê Xoserî yê Vakur û Rojakewtena Sûrîye Sîham Qorîye peynî de wina vat: “Xora ma zanayêne ke do Amerîka rojêk xo pey ser bianco. Na yewe ra zî mi tim vat ke krîzê Sûrîye ancax hetê şaranê Sûrîye ra eşkeno bêro halkerdene. Heman wextî de ganî Neteweyê Yewbîyayeyî û Konseya Asayîşî ya Neteweyê Yewbîyayeyî ganî hemverê hêrişanê îşxalkerdoxan ê dewleta Tirkî de tedbîran bigîro.”

Vervatoxê QSDyî Kîno Gabrîyelî zî vat: “Qerarê Amerîka zirar dano mucadeleyê hemverê DAÎŞî. Dêra Zor de hewna zî mucadeleyê hemverê DAÎŞî dewam keno. Nê qerarî ra dima çeteyanê DAÎŞî Hecîn de dest bi hêrişî kerd.”

'MA PROJEYANÊ ÇAREYAN MUNAQEŞE KENÊ'

Gabrîyelî wina qisey kerd: “Bi nê qerarî dişmenanê Sûrîye rê berî abî. No qerar xusûsen seba dewleta Tirkî ke tim hêrişê îradeyê şarî kena ber akeno. Yew senaryoya newî amî hadrekerdene. Seba pawitişê Sûrîye ya ameyoxe ma do pawitişê projeyê xo bidomnê. Nika wina munaqeşeyî yenê kerdene ke seke ma hendî nêeşkê raya xo ra şirê. La rayê çareyî yê ma estê. Sey QSD projeyê ma yê pawitişê şaranê ma estê. Planê ma yê cîyayî estê û ma nika înan ser o munaqeşe kenê. No hêzê ma esto.”