Sorxîne Makoya ke xoverdayîşê Kobanê de Fermandara Cepheyê Kanîya Kurdan bibî û uca de çimêkê xo vînî kerd, bi wesîleya 1ê Teşrîna Peyêne Roja Kobanê ya Dinya ANFyî rê qisey kerd.

Sorxwîne Mako da zanayene ke 2014 de ê koyanê Kurdîstanî de bîyê û bi radyoyêkî şerê Kobanê teqîb kerdêne. Sorxwîne vat: ''Zerrîya ma hetê şarê Kobanê de bîye. Dima ma bire daye ke şorê Kobanê. Ma verê xo da Kobanê. Rayîr de tay embazê hetê dişmenî ra tepişîyayî, tay embazê ma verî ke ma biresê Kobanê birîndar bîyî. Ma sînorî ra derbazê Kobanê bîyî. A hele camêrdêk ame û mi rê vat 'Me şo Kobanê, ti do bimire.' Mi zî vat 'Eke welat mi destî ra şoro ez cuye pê se kena.' Wexto ke ma resayî têlanê sînorî leşkeranê tirkan bi 30 tankan hêriş kerd. Heta ma resayî Kobanê 28 embazê ma birîndar bîyî.

Ma qasê 300 kesî kewtî Kobanê. Kobanê de şerêko çetin ameyêne kerdene. Kobanê vêşayêne. Ma derbazê cepheyê Kanîya Kurdan bîyî. Embaz Gelhat uca de bi û ey ma rê teyna vat '3 rojan şehîd mekerê, dima şima do tewrê şerî bibê.' Kobanê de a raşte mabênê îdeolojîya înkarî û îdeolojîya Apogîran de şer est bi. Cergan merdimê weşî vêşnayêne.

Cepheyê Kanîya Kurdan de hêz û moralê ma tim est bîyî. Se ra 80ê hêzê ma cinîyî bîyî. Fermandarî cinîyî bîyî. Kobanê de cinîyan ê şerwanan morê xo da binê tarîxî yo. Kobanê sey gola gonîye bîye ka ancî zî ser kewte. Bi desan kokim, cinî, doman û ciwananê Kobanê bi qehremanî şer kerdêne. Ancî vengdayîşê Rayber Apoyî ra dima Vakurî ra bi hezaran cinî, kokim û ciwanan verê xo dabi Kobanê.

Wexto ke ma plansazîya çalakîyan kerdêne obus û hawanî erzîyayî. Kobanê de teqayîşêko pîl qewimîya. Dima bi vengêkê bermayîşî ez ameya xo ser. Dima zî mi nêweşxaneyêkê Vakurî de çimê xo akerd. Mi o çax nêweşxane de televîzyonî ra eşnawit ke Kobanê azad bîya. Ez a hele bermaya. Ez key nêweşxaneyî ra vejîya agêra Kobanê.

Roja Kobanê ya Dinya bi xoverdayîşê YPG û YPJyî ameye îlankerdene. Ruhê Kobanê yê neteweyîyî morê xo da binê tarîxî ro. Dinya Kobanê de qehremanîye dîye.''