TEV-DEM: Hemverê îşxalkarîya Tirkî de mucadeleyî xurt bikerê

TEV-DEM'î hemverê ronayîşê dêsî yê dewleta Tirkî yê dorê Efrînî de razînêbîyayîşê xo ard ziwan, sere de seba Efrînî seba hemeyê erdê Sûrîye veng da ke hemverê hêrişanê dewleta Tirkî de mucadele bêro xurtkerdene.

Têgêrayîşê Cimatê Demokratîkî (TEV-DEM) derheqê dêso ke dorê Efrînî de hetê dewleta Tirkî ra yeno viraştene eşkerayîyêk daye. TEV-DEM'î eşkerayîya xo de nê vatî:

“Ma sey Têgêrayîşê Cimatê Demokratîkî (TEV-DEM) hetê dewleta Tirkî ra bi viraştişê dêsan îzolekerdişê Efrînî erdê Sûrîye ser o şermezar kenê. Ma do bi heme metodanê mîyandewletîyan ê meşrûyan hemverê nê îşxalî de vinderê.

Wextêk de ke teşebusê mîyandewletî yê seba viraştişê qanûnê Sûrîye yê demkî yê neweyî yenê kerdene, dewleta Tirkî ya îşxalkare halî aloznena û çareserîya sîyasîye asteng kena. Dewleta Tirkî dereceya îşxalî ravêrnaya û gamê aye yê hedravêrteyî resayî dereceya îzolekerdiş, qirkerdiş û vurnayîşê demografîkî. Dewleta Tirkî kena ke bi vurnayîşê nasnameyê Efrînî yê Kurdî yê Sûrîye açarno perçeyêkê Tirkîya. Bi nê hawayî heme qanûn û peymananê mîyandewletîyan binpay kena.

Tirkîya tu wextêk hemverê organîzasyonanê terorîstan ê DAÎŞ û El-Nûsra de nêvejîyaye, eksê nê de tim çek, pere, derman û heme îmkanî dayî înan ke nê organîzasyonî alozî û terorê Sûrîye bidê dewamkerdene û hêzê Sûrîye pê nêkerê.

Tirkîya bi viraştişê dêsî yê Efrînî wazena ke Efrînî tewrê sînorê dewleta Tirkî bikero. Dêso ke hêzê îşxalî yê Tirkîya awankerdişê êyê Efrînî xo rê meşrû vîneno, teşebusê Sûrîye ra îzolekerdişê Efrînî yo. Labelê Enqere pawitişê asayîşê xo keno mazeret.

Tirkîya bi nê teşebusan û bi bêvengîya mîyandewletî û Rûsya ke benê sebebê perçebîyayîş, îşxal û îzolasyonî, wazena ke senaryoyê Qibrisî û Lîwa Îskenderî tekar bikero. Ganî Rûsya bi mesuldarîya xo ya exlaqîye û tarîxîye hemverê kerdişanê Tirkîya de vejîyo.

Ma veng danê şarê xo yê her cayî; şarê xo yê Vakur, Başûr, Rojawanê Kurdistanî ke hemverê gamanê hedravêrteyan ê dewleta Tirkî ya îşxalkare yê Efrînî û temamê Sûrîye de mucadeleyê xo xurt bikerê. Ma bi îradeyê şarê xo yê xoverdayoxî bawer ê û ma bawer kenê ke planê partîya terorîste AKP'yî do bin bikewê, binkewtişê aye yo peyên weçînitişanê cayîyan de bi, naye ra bi nê kerdişan wazena ke miletperestîya xo gane bikero.

Ma veng danê heme organîzasyonanê mîyandewletan, Konseya Asayîşî, Yewîya Ereban, heme hêzanê demokrat û aşitîperweran ke hemverê kerdişanê dewleta Tirkî ya îşxalkare yê Efrîn, Îdlib, Bab, Cerablûs û Ezazî de vejîyê û aye ser o zextan bikerê ke erdê Sûrîye ra vejîyo û îradeyê şarî rê hurmet ramojno.”