Tirbesipîyê de 120 hezar roniştoxê qeza hêrişanê dewleta tirke ya îşxalkere ra bê ceyran û bê awe mendî. Qeza de 14 hezar û 700 wendekarî zî nêeşkenê perwerdeyê xo rê dewam bikerê.

Hetkarê Hemserekanê Meclîsê Tirbesipîyê Mizgîn Lezgînî derheqê babete de ANFyî rê qisey kerd.

Lezgînî îfade kerd ke dewleta tirke ya îşxalkere 13ê çeleyî ra nata hêrişê Tirbesipîyê kena û vat: ''Şar nika binê zehmetîye de yo. 13ê çeleyî ra nata ceyran û awe bi temamî şîyê. Dewleta tirke hêrişê merkezanê ceyranî, petrol û gazî kena. Mazot û jeneratorê ma hê qedîyenê.''

Lezgînî da zanayene ke hêrişî tewr zaf tesîrê domanan kenê û vat: ''Qeza de xeylêk domanî nêweş kewtî. Hêrişî bi giranî tesîrê domanan kenê. Domanî panîk kenê, tersenê ke rabikewê. Ma domananê xo gênê verarê xo û wina kenê hewna. Hêrişî biqedê zî cara tesîrê domanan kerd. Perwerde zî vinderte yo.''

Lezgînî pare kerd ke şar bîranê awe ra îhtîyacîyanê xo peyda keno û vat: ''Bîran ra nêbo awe çin a ke şarê ma bişimo. Şaredarîya ma kena ke awe biresna şarî la îmkanê ma kêm ê. Hêrişan ra 20 dewî bê awe û bê ceyranî mendî. Ma hewteyêke verî na mesele çareser kerdbî la hêrişanê dewleta tirke newe ra dest pêkerd. Ma kenê ke bi îmkananê xo meseleyanê şarî çareser bikerê la zaf zehmetî ancenê.''