Hemserekê Meclîsê Kobanê Mistefa Îtoyî derheqê hêrişanê dewleta tirke yê vera Rojawanî yê ke rojanê peyênan de zedîyayî de ANFyî rê qisey kerd.

Mistefa Îtoyî vat: ''Ma roja verêne a şorişî ra çarçewaya projeyê neteweya demokratîke de sîstemêko heme şarî û bawerîyî eşkenê xo  tede îfade bikerê, esas girewt. Serdestan nêwaşt ke no sîstem Kurdîstan û Rojhilatê Mîyanênî de aver şiro. Coka cade hêrişanê vera ma dest pêkerd û qet nêvindetî. Serkêşîya nê hêrişan dewleta tirke kena. Tehamulê dewleta tirke sîstemê demokratîkî rê çîn o. Sîstemê demokratîkî ra têna şarê Rojawanî nê şarê Tirkîya zî eşkenê feyde bikerê, coka dewleta tirke nê sîstemî nêwezano. Nê semedî ra bi destê înan DAÎŞî hêrişê Kobanê kerd. Kobanê semedê DAÎŞî cayêko stratejîk nêbi û karê înan tîya ra çînêbi. Kobanê rîyê projeyê neteweya demokratîke ra hedef ame girewtene  û ewro hema zî hedef de yo.

Hêrişanê dewleta tirke de domanê qişkekî yenê bombardumankerdene. Nê domenî semedê Tirkîya qey tehluke yê? Kobanê ra heta Eyn Îsayî heme cayê ke yenê bombardumankerdene de qet nuqtayêka leşkeî çîn a. Saetanê hêrişî zî vîjnenê. Saete 12:00 de domanî dibistanî ra vejîyenê şinê keye. Wazenê komelî bitersnê. Hendê  Tirkîya Rusya, Koalîsyonê Mîyanneteweyî û Amerîka zî berpirsîyar ê. Bêvengîya înan paştî dana dewleta tirke. Her hetê Sûrîye ra multecîyî ameyî Rojawan. 11 hezar multecî estê. Dewleta tirke bi hêrişanê xo eynî wextî de paştîdayîşê xo yê DAÎŞî newe kena. Dewleta tirke krîzanê zerî wazena bikirişo teber û şarî bixapîno esil meseleya ci ra raqilno.

Şarê Rojawanî rixmê heme hêrişan wayîrê erdê xo vejîyano û herra xo canêverdeno. Tîya têkoşîno pîl ame dayene. 2012î ra nata  tengayîyê ekonomîkî, timûtim ablûqayî û ambargo estî la rixmê nînan şarî erdê xo canêverda do ewro zî cameverdo. Xoverdayîşê şarî dewam keno. Ganî hêzê mîyanneteweyî, hêzê demokratîkî û dewlete ke Sûrîye de berpirsîyarîya xo bîyarê ca. Eke verê hêrişanê dewleta tirke nêro girewtene meseleyê Sûrîye do nêro çareserkerdene. Heta ke nê hêrişî bibî Sûrîye de ne îstîkrar ne zî yewîya sîyasîye yena ronayene. Ne zî şarî benê yew û qanûne bingeyî qet mumkun nîyo. Her kes do dewleta tirke ra zirar bivîno. Dewleta tirke û çeteyê ci hêrişan de sînor nasnêkenê. Peyê hêrişanê Ewropa de zî dewleta tirke esta. Coka ma veng danê ke wa her kes vera hêrişanê dewleta tirke vengê xo berz bikero.''