Dewleta tirke ya îşxalkere dima ke Herêmanê Pawitişî yê Medya de verê gerîlayan de bin kewte hêrişê Rojawanî kerd. Dewleta tirke roja yewşemeyî ra nata dezgehanê xizmetî yê Rojawanî dana bombayan ver. 

Dewleta îşxalkere hêverî Eyn Îsa, Kobanê, Dirbêsîyê û Kantonê Cizîre dayî bombayan ver.

Dewleta tirke hêrişê îstasyonê ceyranî yê Eyn Îsayî, noqtaya asayîşî ya Kobanê û îstasyonê ceyranî yê Kobanê yê bi nameyê Lafarge dayî bombayan ver. Netîceya nê bombardumanan de Kobanê û 30 dewanê dormeyê ci de û Eyn Îsa de ceyran birîya. Îşxalkeran Kobanê de hêrişê depoyêkê genimî û bînaya îtfaîyayan da bombayan ver.

Amûdê de îstasyonê ceyranî, dewa Kotihî û dewa Mekeba, Cizîre û Tirbêsipîyê de santralê ceyranî, bînayê xizmetî, noqtaya asayîşî ya rejîmê Sûrîye dîyayî bombayan ver.

Dewleta îşxalkere hêrişê rojnamegeranê ke herême de dîmenan gênê, zî kena. Vizêr saete 16.30 de Kobanê de droneyê çekdarî yê dewleta tirke rojnamegerî dayî bombayan ver û rojnamegerêk birîndar bi.

Netîceya hêrişan de Kantonê Cizîre de ceyran bi temamî birîya. Ofîsê Îrtîbat û Enerjî yê Cizîre keyepelê xo de da zanayene ke bombardumanan ra fabrîkayan berardişî vindarnayî.

Herêma Koçeratî ya Dêrikî de merkezê petrolî yê Tifla dîya bombayan ver û xeylêk wesayîtan zerar dî. Dewleta îşxalkere îstasyonê gazî yê dewa Siwêdîyê zî 10 reyî daye bombayan ver.

Verê hêrişanê dewleta tirke ya îşxalkere de dezgehê mîyanneteweyîyî bêveng ê. Dewleta tirke bi hêrişanê xo sûcanê şerî kena la hema zî vera ci nêrazîbîyayîş nêame mojnayene.

Fermandarîya Pêroyî ya QSDyî vera hêrişanê dewleta tirke bi eşkerayîyêke nêrazîbîyayîşê xo mojna û vat: ''Wezîrîya Pawitişî ya dewleta tirke ya îşxalkere ancî bi zûran îdîa kerd ke hêrişanê ci yê vera Rojawanî de şerwanê ma şehîd bîyê. Nê îdîayî zûr ê. Îşxalkerî bi rayîrê nê îdîayan kenê ke sûcanê xo yê hedefkerdişê binawanî, merkezanê xizmetî, waranê sivîlan û degehan binimna. Belgeyê ma îsbat kenê ke nê sûcî zelal ê. 

Dewleta tirke ya îşxalkere bi droneyanê çekdaran dezgehê enerjî, embarê genimî, ekîbê îtfaîya, keyeyê sivîlan, baxçeyî, rayîrî û dormeyê şaristanan kerdî hedef. Nê hêrişan de her çi wêran bi û xizmetî vindertî. Nê hedefî raşta raşte eşkera kenê ke dewleta tirke ya îşxalkere dişmenîya herêma ma kena. Nê hêrişî bi zelalî sûcê şerî yê. 

Ma do çarçewa heqê xo yê meşrûyî de qetî cewab bidê nê hêrişan. Ma do her wextî ra zêdeyêr şarê xo û herêmanê xo bi xurtî bipawê. Şerwanê ma do hêrişanê îşxalî yê dewleta tirke bêcewab nêverdê. No sozê ma yo.''