Rîspîyanê cimatê Efrîn û Şehba û Şêxanê Ereban vizêr qezaya Fafînî de ameyî pêser û serkewtişê QSD’yî yê rojawanê Firatî ercnayî. Kombîyayîş de îşxalê dewleta Tirkî yê Efrîn, Ezaz, Bab û Cerablûsî ser o ame vindertene û veng dîya hemeyê Sûrîye ke hemverê îşxalan de vejîyê.

‘Kurd Û Erebî Destê Xo Bidê Yewbînan’

Serê nameyê Eşîra Batoşê de Xelf El-Mihemedî vat, “Ma wayîrê umîdê yewbîyayîşê erdê Sûrîye yê. Naye ra ganî Kurd û Erebî destê xo bidê yewbînan û hemverê îşxalê Tirkîya de vejîyê.”

Rîspîyanê herêma Efrîne ra Welîd Xûbarî zî vat, “Ma şarê Sûrîye nêwazenê ke erde ma perçe bibo. Ma veng danê hemeyê dinya ke wa artêşa Tirkî û çeteyanê ci erde Efrînî ra vejê. Ma veng danê QSD’yî ke hendî verê xo bido rojawanê Firatî û dewleta Tirkî û çeteyanê ci ûca ra vejo.” 

‘Ma şarê Sûrîye Eşkenê Problemanê Xo Çareser Bikerê'

Eşîra El-Ximsî ra Şêx Elî El Xemîsî zî serkewtişê QSD’yî pîroz kerd û wina qisey kerd: “Ma umîd kene ke QSD erdê ke nika binê îşxalê Tirkîya de yê înan zî bixelisno. Wa hêzê xerîbî bizanê ke şarê ke Sûrîye de yê eşkenê problemanê xo çareser bikerê.

Rîspîyê eşîra Bobenehî zî da zanayene ke ê do nêverdê çew mabênê şaranê Sûrîye bikero xirab û vat, “Ma hemverê her tewir îşxalê Sûrîye de yê. Naye ra ma hemverê îşxalê Îsraîlî yê Sûrîye yê zî."

'Îşxalê Tirkî Sûrîye Keno Perçe'

Eşîra Batûşeh a herêma Şehba ra Îbrahîm Mûseyî zî îşxalê Tirkîya yê Şehba şermezar kerd. Mûseyî ard ziwan ke dewleta Tirkî Sûrîye perçe kena û vat: “Sûrîye eşkena problemanê xo xo mîyan de çareser bikero.”

Rîspîyanê qezaya Cindirêsî yê Kantonê Efrînî ra Hec Welîd Hemedêyî zî serkewtişê Hêzanê Demokratîkan ê Sûrîye (QSD) pîroz kerd û vat, “Ma do pîya Sûrîyeyêka demokratîke awan bikerê.”