Endamê Yewîya Çerkezan a Minbicî Semî Hedaqî ANFyî rê qisey kerd û vera hêrişanê îşxalî yê dewleta tirke nêrazîbîyayîşê xo mojna.

Semîr Hedaqî pare kerd ke dewleta tirke ya îşxalkere wazena herême de pê hêrişanê xo alozîye awan bikera û pê destê cergan herême de heta nika no kerd. Hedaqî da zanayene ke na safha de hînî çîyêk nêmendo ke cergî bikerê û vat: ''Rewşa pêro komanê cerganê ke herêmanê îşxalkerdeyan de ca bîyê, eşkera ya. Nê cergî vilabîyaye yê û tim kewenê pê.

Dewleta tirke hetêkî ra pê hêrişanê Kobanê û Minbicî kena ke tengîya xo binimna hetêkê bînî ra zî kena ke çimê şarî biterso. Destpêkê şorişî ra nata şarê herême raştê hêrişan yeno. Heta nika zî şarî vera hêrişan apey gamêke nêeşte. Naye ra dima zî do nêerzo. Hayîya şarî zî pê kayanê tehrîkkerdişî est a.''

Hedaqî bale ante ser ke dewleta tirke 2011 de armanc kerdêne ke Camîyê Şamî de nimajî bikera la nêeşkaye nê armancî bîyara ca. Hedaqî vat: ''Dewleta tirke rixmê cerganê ke dormeyê ci de kom bîyê, nêeşkaye naye bikera. Nika cergî milê dewleta tirke rê bîyê bar û dewleta tirke wazena nînan ra bixelisa. Dewleta tirke zanena ke pêro kartê destê ci qedîyayî. senî ke dewleta tirke waştbî nînan bişuxilna, nika zî wazena tira bixelisa.''