YPGyî  bi wesîleya serrgêra îşxalê Efrînî yê dewleta Tirkî eşkerayîyêk daye û va: ''Ma do hemverê îşxalê Efrînî de bêveng memanê!''

Eşkerayîye de nê ameyî vatene:

 ‘PAKKERDIŞO ETNÎKÎ, DESTESERDAYÎŞ Û HER TEWIR BINPAYKERDIŞ…’

“Dewleta Tirkî ya ke heme enerjîya xo dana seba ke hêrişanê xo yê îşxalî heqdar ramojno, seba averşîyayîşê hêzanê ma yê Rojawanê Kurdistanî bido vindarnayene û vernîya xurtbîyayîşê demokratîkî yo ke şarê ma dorê cuya hempare de awan kerdo bigîro, planê xo yê hêrişkarî ancî fînayê dewre. Dewleta Tirkî 20ê Çile ya 2018an de bi havila ê hêzanê ke çimê xo nê îşxalî rê girewtê hêrişê xo dayî destpêkerdene. Yewîyanê ma yê YPG, YPJyî û şarê ma yê Kurdistanî tewirêko winayên ramoto ke rayîr nêdayo nê îşxalî. Hemverê nê hêrişan de ke bi hêzêkê bejahîyî yê bênisbetî, bi heme tewir sîlehanê giranan û hêrişanê giranan ê hewayîyan û bi teknolojîya avere ya şerî ameyî kerdene, bi seyan şerwanê ma tewirêkê fedaîyî ramot, şarê ma zî 7 serre ra bigîrê heta 70 serre mîyanê xoverdayîşî de cayê xo girewt.

18ê Adare de, dimayê gama ma ya xoantişî ke seba vernîgirewtişê qirkerdişan ma eştebî, dewleta Tirkî ya îşxalkare Efrîn de û qezayanê ci de yewîyê xo yê îşxalkarî bica kerdî. Ewro, kîşta nê yewîyanê îşxalkaran de xeylî grûbê terorîstî û çeteyî estê. Coxrafyaya Efrînî ke pakkerdişo etnîkî tede yeno kerdene û bi hawayêkê sîstematîkî dest dîyeno serê zengînîya bajarî, netîceyê gamanê dewleta Tirkî ya faşîstî de nê halî de ya.     

 ‘MA DO HER GAME VÊŞÊR XOVER BIDÊ’

YPGyî peynîya eşkerayîye de vat: “Sey yewîyê YPG û YPJyî, ma do hemverê gamanê îşxalkar û faşîstan ê tu hêzan de bêveng memanê” û wina domna, “Hemverê nê îşxalê Efrînî de seba azadkerdişê şarê ma û coxrafyaya ma, ma eşkera kenê ke ma do bi her tewir xoverdayîsî mucadele bidê. Hemverê dewleta Tirkî ke ewro hemverê Rojawanê Kurdistanî û Vakurê Sûrîye de ziwanê îşxalkarîye şuxulnena, ma eşkera kenê vanê ke ercê demokratîkî yê ke şaran vetê meydan, ma do bi tewirê xo yê tewr heqdarî yê xoverdayîsî heme hêzan ra zêdeyêr ramojnê û bipawê.”