Fermandarîya Pêroyî ya YPGyî bi wesîleya 1ê Teşrîna Peyêne Roja Kobanê ya Dinya eşkerayîyêka nuştekîye daye. Eşkerayîye wina ya:

''Ma Roja Kobanê ya Dinya ya 1ê Teşrîna Peyêne sela kenê û şexsê embazanê ma Arîne Mîrkan, Rêwane, Gelhat, Paramaz, Herdeman û Serzorîyan de pêro şehîdan bi rêzî yad kenê. 

9 serrî verî serkêşîya YPG û YPJyî de vera DAÎŞî 134 rojan xoverdayîş ame kerdene û netîceya nê xoverdayîşî de DAÎŞ ame binvistene. Merdimatîya ke bîya şahîdê nê xoverdayîşî hetê şerwananê rûmetî û azadîye de vera DAÎŞî vinderte. Bi wayîrvejîyayîş û yewîya şarî Kobanê û merdimatîye ameyî xelisnayene. Kobanê DAÎŞî rê bîye gor û Baxoz de kerraya nê gorî ronîyaye.

Ewro dewleta tirke ya îşxalkere û îqtîdarê AKP-MHPyî yo ke DAÎŞî temsîl keno seba ke mîrasê merdimatîye Şorişê Rojawanî çin bikerê û DAÎŞî gandar bikerê têgêrenê. Rixmo ke gefê DAÎŞî nêqedîyayo hêrişê dewleta tirke teyna seba herêma ma ney seba pêro dinya gef ê. Hêzê mîyanneteweyîyî seba menfaetanê xo verê hêrişanê barbaran ê dewleta tirke de bêveng ê. Şaro ke 9 serrî verî seferber bibi ewro zî ganî seba wayîrvejîyayîşê Şorişê Rojawanî seferber bibo.

Sey hêzanê YPG û YPJyî ma bi wesîleya Roja Kobanê ya Dinya ancî şehîdanê xo yad kenê. Bi ruhê 1ê Teşrîna Peyêne ma do wayîrê Şorişê Rojawanî bibê. Seba ke wayîrê Şorişê Rojawanî bibo ganî şarê ma seferber bibo.''