HPGyî 3 gerîlayê ke Avaşîn de pê çeka kîmyewî şehîd bîyî yad kerdî

Merkezê Îrtîbatî û Çapemenîye yê HPGyî (HPG-BÎM) 3 gerîlayê ke 3ê êlule de Warê Xoverdayîşî yê Girê Sorî yê Avaşînî de pê çeka kîmyewî şehîd bîyî yad kerdî.

Merkezê Îrtîbatî û Çapemenîye yê HPGyî (HPG-BÎM) 3 gerîlayê ke 3ê êlule de Warê Xoverdayîşî yê Girê Sorî yê Avaşînî de pê çeka kîmyewî şehîd bîyî yad kerdî. Eşkerayîya HPGyî wina ya:

''Ma eşkerayîya xo ya 15ê êlula 2021î de dabi eşnawitene ke 3ê êlule de artêşa tirke ya îşxalkere vera xoverdayîşê gerîlayanê azadîye yê Girê Sorî de netîce nêgirewte û metodê bêmerdimîye yê sey çeka kîmyewî xebitnayî, nê hêrişan de 3 embazê ma şehîd bîyî.

Embazanê ma Botane, Zînarîne û Delale warê xoverdayîşî yê Girê Sorî de pê xoverdayîşê xo yê destanwarî tarîxê azadîye yê şarê ma de rîpelêko newe akerd. Rayraşîyayîşê serkewtişî de sey çimeyanê tewr pîlan ê hêz û moralî yê Gerîlayanê Azadîye yê Kurdîstanî ê do bêrê vîrardene û bibê sebebê ma yê têkoşînî.

Nasnameyê 3 embazanê ma yê şehîdan wina yê:

Nameyê Qodî: Botan Ozgur

Name û Peyname: Celal Ozcan

Cayê Bîyayîşî: Wan

Maye-Pî: Sadiya-Kemal

Tarîx û Cayê Şehadetî: 3ê Êlula 2021î / Avaşîn

Nameyê Qodî: Zinarîn Welat

Name û Peyname: Rama Şemdîn

Cayê Bîyayîşî: Hesekê

Maye-Pî: Aklîma-Serbest

Tarîx û Cayê Şehadetî: 3ê Êlula 2021î / Avaşîn

Nameyê Qodî: Delal Qamişlo

Name û Peyname: Hîva Mamo

Cayê Bîyayîşî: Qamişlo

Maye-Pî: Hamîde-Îsmaîl

Tarîx û Cayê Şehadetî: 3ê Êlula 2021î / Avaşîn

Embazê ma Botan qezaya Elbaxî ya Wanî de dadîya xo ra bîyo. Embaz Botan şehadetê birayê xo ra dima 2004 de tewrê karanê şorişî bi. Embaz Botan semedê têkoşînê vera polîtîkaya îmha û înkarî ya dewlete 2012 de tewrê gerîlayan bi. Embaz Botan cade cuya gerîlatîye musa û bi fermandar. Embaz Botanî 7 serrî Avaşîn de têkoşîn kerd, rayberîya çalakîyan kerde û terw peyên zî Warê Xoverdayîşî yê Girê Sorî de ca girewt. Embaz Botanî tim xîret kerd ke hêrişanê dişmenî pûç bikero. Ey tim pê îradeyê Apogîrî têkoşîn kerd, embazanê xo rê bi milîtanêko mîsal. Xeta şerî û cuye ya embaz Botanî do tim têkoşînê ma roşnî bikera.

Embaze Zinarîne Hesekê de dadîya xo ra bîye û a 2013 de xeyalê xo ard ca û tewra gerîlayan bîye. Embaze Zinarîne verî Avaşîn de wezîfe kerd û xeta PKK û PAJKî tim xo rê esas kerde. Embaz Zinarîne wextêkê kilmî de bîye fermandare. Embaze Zinarîne xoverdayîşê Girê Sorî de rolê rayberîye ard ca, felsefeya Rayber Apoyî kesayetê xo de eşkera kerd û bîye sembola milîtanîya mîsale. Xoverdayîşê embaze Zinarîne yê vera çekanê kîmyewîyan do heta peynî nêro vîrakerdene.

Embaze Delale Qamişlo de dadîya xo ra bîye. Embaze Delale verê DAÎŞî Şorişê Rojawanî de şer kerd. Embaze Delale dima azadîya cinîyan xo rê kerde esas û têkoşînê xo koyanê azadan ê Kurdîstanî de dewam kerd. Embaze Delale pê embazî, enerjî û kedkarîya xo şinasîyaye. A herêma Avaşînî de tewra xeylêk çalakîyanê serkewteyan bîye û derbê giranî dayî dişmenî ro. Embaze Delala ke netîceya hêrişê bi çeka kîmyewî de şehîd bîye xeta ci ya xoverdayîşî hetê embazanê ci ra do bêra tacîdarkerdene.

Ma sere de keyeyanê ercîyayeyan ê embazanê xo rê pêro şarê welatperwerî yê Kurdîstanî rê serweşîye wazenê. Ma soz danê ke xeyalê 'Rayberîya Azade û Kurdîstanê Azadî' yê embazanê xo bîyarê ca.''