Bi wesîleya 1ê Êlule Roja Haştîye ya Dinya de Amed, Wan û Îstanbul de mîtîngî ameyî kerdene. Mîtîngan de vera polîtîkayanê şerî yê îqtîdarî semedê haştîye ame vengdayene û azadîya Rayberê Şarê Kurdî Abdullah Ocalanî ameye waştene.
Bi wesîleya 1ê Êlule Roja Haştîye ya Dinya vizêr Amed, Wan û Îstanbul de mîtîngî ameyî kerdene.
Amed de serkêşîya Hêzanê Kede û Demokrasîyî bi wesîleya 1ê Êlule Roja Haştîye ya Dinya rayraşîyayîş ame kerdene. Îdarekarê DPB û KCD, wekîlê DEM Partî, îdarekarê rêxistînanê komelê sîvîlî yê bajarî, Dayîkê Haştîye û xeylêk kesî tewrê rayraşîyayîşî bîyî.
Dayîkê Haştîye yê ke bi laçikanê xo yê sipîyan tewrê çalakîye bîyî bi pankartê ''Azadîye û haştîye nînê tecrîdkerdene'' rayraşîyayîş da destpêkerdene. Aktîvîstê TJA zî bi pankartê ''cinîyî haştîye wazenê''rayra şîyî. Rayraşîyayîş de dovîzê ''bijî aşitî'' ameyî kiriştene û sloganê “Berxwedan jiyane”, "Bimre koletî, bijî aşîtî" ameyî vatene û vera tecrîd û şerî haştîye ameye waştene.
Badê rayraşîyayîşî Meydanê Şêx Seîdî de mîtîng ame kerdene. Hemsereka Pêroyî ya DBPyî Çigdeme Kiliçgun Uçar wird rojnamegerê ke dewlete tirke qetil kerdî yad kerdî û vat: ''Qet zûrêka şima, operasyon û hêrişê şima nêeşkayî heqîqetî bibedilnê û ewro ra tepiya zî nêeşkê. Kiştişê rojnamegeranê sûcê şerî yo. Rojnamegerî seba ke raştîye nusenê yenê qetilkerdene.''
Uçare ard ziwan ke Rayberê Şarê Kurdî Abdullah Ocalan eşkeno prosesê haştîye rayra bero û nê vatî: ''Şarê kurdî hiş nêkerd, nêvindert. Vera heme zulmî tim haştîye waşt. Qet hêzêk nêeşkeno nê vindarno. Şarê kurdî semedê haştîye payan ser o. Destê şima de têna şer est o. Îqîtdarê şima têna mendo û keno ke pê şerî payra bimano. Êyê ke ziwanê şarê kurdî rê tehemul nêkenê nêeşeknê qale bierzê ma. Vera ziwan û kulturê ma şer kenê. 25 serrî yo Îmrali de tecrîd anê ca. Îmrali de haştîya bianore yena waştene. Birêz Ocalan semedê înşakerdişê haştîya bianore gêreno sîyasetmedaranê biceseran. Ma do semedê haştîya bianore têkoşîn bikerê.''
Mîtîngê 1ê Êlule Roja Haştîye ya Dinya yê Wanî de zî Hemserekê Pêroyî yê DEM Partî Tucer Bakirhanî qisey kerd. Bakarihanî veng da ke wa hêrişê dewleta tirke yê vera Kurdîstanî bêrê vindarnayene û vat: ''Helêke verî polîtîkayanê şerî biqedinê. Wa Tirkîya bi pêro renganê xo yew ca de biciwîyo.''
Îstanbul de hetê Hêzanê Kede, Haştîye û Demokrasîyî ra Kadikoy de mîtîng ame kerdene. Mîtîng de ame vîrvistene ke îqtîdarê AKP-MHPyî semedê çaresernêkerdişê meseleya kurdan israr keno û ame vatene ganî polîtîkayê şerî yê ke têna merg anî û gonî û hesaran danê rişnayene ganî cade bêrê qedînayene.
Badê eşkerayîye qirseyo ke bi sloganan û tîlîlîyan vila bi raştê hêrişê polîsan ame 8 kesî bi peykî kelemçekerdişî ameyî destbendkerdene.
