Xeylêk şaristananê Vakurê Kurdîstanî de bi wesîleya 1ê Êlule Roja Haştîye ya Dinya çalakîyî ameyî kerdene.

Qezaya Silopîya ya Şirnexî de bi wesîleya Roja Haştîye ya Dinya rayraşîyayîşêk û şayîyêke ameyî kerdene. Serkêşîya DEM Partî û DBPyî de girseyî bi slogananê sey Bimre xiyanet bijî Kurdistan”, “Jin, Jiyan, Azadî” û “Têkoşîna jinê li her derê ye” rayraşîyayîş kerd. Rayraşîyayîş Berê Sînorî yê Xaburî de vurîya mîtîngî. Tîya de Hemserekê Pêroyî yê DBPyî Keskîn Bayindirî xîtabê girseyî kerd û ard ziwan ke şarê kurdî 40 serrî yo seba haştîye û azadîye têkoşîn keno. Bayindirî bale ante tecrîdê Îmraliyî ser û vat: ''Şarê kurdî bi têkoşînê xo muxatan mojneno. Rayîrê çareserîye Rayberê Şarê Kurdî Abdullah Ocalan o. Muxatab Îmrali yo.'' Bayindirî vist vîrî ke Başûrê Kurdîstanî de bi hemkarîya PDKyî dewleta tirke hêrişanê îşxalî keno û venga PDKyî da ke rayîrê îxanetî ra abigêro.

Agirî de serkêşîya DEM Partî û Hêzanê Demokrasîyî û Kede de rayraşîyayîş ame kerdene. Rayraşîyayîş de Wekîlê DEM Partî Heval Bozdag zî amade bi. Çalakîye de pankartê sey ''Haştîye heqê merdiman o'' ame akerdene û sloganî ameyî vatene.

Colemêrg de rêxistinanê komelê sivîlî verê bînaya DEM Partî de eşkerayîyêke daye. Hemşarede Vîyane Tekçeya ke herinda ci de qeyûm amebi tayînkerdene zî tewra eşkerayîye bîye. Eşkerayîye de veng dîya ke seba haştîye wa tecrîdê Îmraliyî bêro wedaritene.

Qezaya Geverî ya Colemêrgî de zî eşkerayîyêke ameye dayene.