Serekê Federasyonê Elewîyanê Demokratîkan Demîr Çelîkî derheqê rewşa erdlerzî û polîtîkaya dewlete ya vera elewîyan de ANFyî rê qisey kerd.

Demîr Çelîkî vist vîrî ke badê erdlerzî dewlete babeteanê hetkarî û mudaxale de kêm mende û nê vat: ''Seke yeno zanayene merkezê erdlerzî Bazarcix û Elbîstanê Mereşî yê. Wird qezayan de zî zafanê elewîyî ciwîyenê. Erdlerzê ke bi şîdetê 7.7î de qewimîyayî, bîyî sebebê rijnayîşê giranî. Rixmê nê rijnayîşanê giranan dewlete û dezgehê dewlete 40 saetanê verênan de qet çînêbî. Badê 40 saetan Mereş, Dîlok û tay bo zî Hatay de esayî. Rixmo ke merkezê erdlerzî Bajarcix û Elbîstan ê dewlete roja hîrêne de resaye ci. Dewleta ke erlerzî sey felaketa seserre name kena û derheqê ci de qet tedbîrî nêgirewtî badê erdlerzî cî mexdûranê erdlerî zî rê cîya nêzdî bîye. Dewleta xora tim vera kurdan, elewîyan û demokrasîyî ya. Merdişê elewîyanê kurdan xeymê dewlete de nîyo. No erdlerz de reyna eşkera ame vînayene.  Xora Semsûr de zî  bi eynî zîhnîyetî nêzdî bîye û roja çarine ya erdlerzî resaye ci.''

Demîr Çelîkî wina dewam kerd: ''Xebata bi merkezê AFADî de vera elewîyanê kurdan cîyatîya polîtîke est a. Dewleta tirke na felakete de sey însanî, wîjdanî û ehleqî nêzdî nêbena. Şaro ke dewe, qeza û bajaran de ciwîyeno, goreyê nasnameyê înan ê etnîkî û fîkrê înan ê polîtîkî  û bawerîya înan nêzdîyê înan bîyî.  Verî ewnîyayî kesê ke mexdûr ê, mirenê û binê rijnayîşî de yê, vîjnayoxê înan ê ya nê. Wina bêwîjdan ê. AFAD û burokrasîya leşkerî û sîvîl zî goreyê fermanê ke corî ra ame têgêrayî. Dewlete  û dezgehê ci hem di rojî war de nêbî hem zî wazenê ke verê paştîdayîş û hetkarîya şarê ma bibê asteng û kerd ke dest bidê serê hetkarîya ke ameye.''

Çelîkî ard ziwan ke dewlete wazenê felaketa erdlerzî biçarne firsetî û vat: ''Dewlete bi xo xebata cigêrayîş, xelisnayîş de çîn a, xebatan rê bena asteng, hetkarîye nêkena û kesê ke  hetkarîye kenê verê înan gena. Hetkarîya ke hetê şar û şaredarîyan ra yena sey hetkarîya fermî ya dewlete mojnenê. Medyaya ke goreyê zîhnîyetê nîjadperestî ye dewlete têgêrena sey wezîfe Mereş û Hatay vetî vernî. Hetkarîya ke dewlete nêkerde, hetê şar û rêxistinanê komelê sîvîlî û ra ameye kerdene, sey hetkarîya dewlete ameye mojnayene.

Ma cade badê erdlerzî sere de  FEDA, DİK, MARDEF sey Platformê Komeleyanê Cayîyan masaya krîzî na ro. Eynî roje KNK, KCDK-E û ADGByî zî semedê paştîdayîşî veng da. Ma pîya bi HDP û Rêxistinanê Komelê Sîvîlan û Baroyan hempar têgêrenê ke hetkarî bireso mexdûran.''

Çelîkî vist vîrî ke badê erdlerzî elewîyê kurdî şawîyenê metropolan û rewşe wina erca:  ''Dewlete tim stratejîya vera kurd û Kurdîstanî rayra bena. Coka zaf reyî qirkerdişî kerdî. Seba ke  Kurdîstanî veng bikero operasyonê leşkerî û sîyasîyî kerdî. Pê bajaran şar bizor herre û bimbarekanê ci ra raqilna.  Seserrî yo vera kurdan na polîtîka yena caardene.  Qirkerdişê Mereşî yê 1978 de bi se hezaran elewîyê kurdî herra ci ra raqilnayî, metropol û Ewropa de kerdî surgun. Tewr peynî de gama ke DAÎŞ Kobanê de bin kewt, kesê ke tira mendî dewlete ey dewa Terolar a Bazarcixî de ca kerdî. Coka nika wazenê bi bahaneyê erdlerzî elewîyanê kurdan erdê înan ra raqilnê, bişawê metropolan. Ûca înan rê îslamê tirk-sunî ferz bikerê. Sere de elewîyî,  wazenê kurdan cêser bifînê, paştîdayîşî û kulturê parekerdişî biqedînê. Xora herinda îlankerdişê herêma afetî de îlankerdişê Halê Îstîsna kayêko polîtîk o. Bi qala kilmê semedê hetkarîya mexdûran game nêerzenê, goreyê menfeatê dewlete û îqtîdarê xo têgêrenê.''