Parlamentera HDP’yî ya Amedî Semra Guzele  babeta Çeteyê Fuhûşî yê Çewlîgî yo ke endamê AKP, MHP û hîzbûlahî ya pîya qoricî û eskerî zî tede ca gênê kirişte rojdemê meclîsî.

Çewlîg de 25’ê Hezîrane de polîsan bi hawayêkê hemwext eşt xeylî adresan ser.  Opreasyono ke vera Çeteyê Fuhûşî ame viraştene de 31 kesî ameyî destbendkerdene. Ame vatene ke ê ke ameyî destbendkerdene mîyanê înan de hetkarê Serekê Şaredarîya Çewlîgî yê AKP’yî  Mûhîttîn Bûkan, polîs Ersîn Yildiz, qoricî Ahmet Varan, Mehmet Tekgoçeno ke rîyê hîzbûlahî ra wextêk zîndan de mendebi, endamê AKP û MHP’yî ya pîya xeylî kesê ke dezgehanê fermîyan de xebityenê estê.

Ê ke oprasyon de ameyî destbendkerdene 29’ê Hezîrane de sewqê edlîye bibî. Destbendkerdeyan 10 kesî ameyîbî tepiştene, 15 kesî bi şertê kontrolê edlîyî ameyîbî veradayene. 21 kesî zî serbest veradîyayîbî. Derheqê dosyaya tehqîqatî de zî qerarê nimtişî amebi girewtene.

Parlamentera HDP’yî ya Amedî Semra Guzele na babete viste rojdemê meclîsî. Guzele vist vîrî ke no çete serra 2016’î hetê polîsan yeno zanayene la ximê naye vernîya ci nêna girewtene û  va: ‘’Çend serrî cuwa ver ciwanêk derheqê nê çeteyî de dîmenî teslîmê polîsan kerdî la polîsan derheqê çeteyî de tehqîqat nêda destpêkerdene û herinda naye de ciwano ke gereyê çeteyî kerd kare ci ra ame vetene.

Guzele  hetkarê serokkomarî Fûat Oktayî ra waşt  derheqê babete de cewabê nê persanê ci bibo: Qey polîsê ke hayî înan çeteyî esta 2016 ra nata vera nê çeteyî çîyêk nêkerd? Qey ciwano ke gerreyê çeteyî kerd  kerê ci ra ame eştene? Qey dosyaya dehqîqatî rê qerarê nimitişî ame girewtene?