Êyê ke Amed de îşkence înan rê amebi kerdene, ameyî tepiştene

Amed de 2 yê înan domanî 4 kesê ke ameybî destbendkerdene û înan rê îşkence amebi kerdene, ameyî tepiştene.  

Hemwelatijê bi nameyê A.E. (17), D.O., S.Û., M.A. (17) û birayê ê M.A. (16) qey hêrişê 24’ê Temmuze yê hemverê Merkezê Polîsan ê semtê Şehîtlikî yê qezaya Yenîşehîrî ya Amedî ameybî destbendkerdene  Dimayo ke karê înan ê mudurîyetê polîsan qedîya, sewqê edlîye ameyî kerdene. Dimayo ke îfadeyê înan dozgerîye de ameyî girewtene, 2 yê înan domanî her panc kesî zî bi waştişê tepişîyayîşî sewqê mehkema ameyî kerdene. Mehkema de S.Û. bi şertê kontrolê edlîyî ame veradayene û A.E., D.O., M.A û M.A zî ameyî şirawitene bi zîndanî.

Maya Domanan Qalê Îşkenceyê Serê Domanan Kerdibi

Maya domanan Akaline wina qalê çîyanê ke ameybî sereyê domananê aye kerdibi: “Gama mi hayîdarîya destbendkerdişî girewte rasterast şîya Şaxê Domanan. Şaxê Domanan mi ra vat kesêk wina înan ver de çino. Gama ke Şaxê Domanan ra vejîyaya mi embazê lajê xo wesayîtê polîsan de dî. Serûçimê ê halêkê perîşanî de bi û xeylî birînî pawa estbî. Nêeşkayêne payan ser o vindero û rayra şiro. 

 Ma pîya bi avûkatî zaf ser o vindertî û peynî de ma mûsayî ke domanê mi Mudurîya Şaxê TEM’î de tepişte yê. Şaxê TEM’î ra înan anons kerd û vat ke domanê to tîya yo. Mi înan ra vat domanê mi qijkek o, çi karê ê Mudurîya Şaxê Terorî de esto. Ê mabênê de înan domananê mi rê îşkence kerdêne. Saete dorê 01.00 ya şewe de dimayo ke avûkat ame înan domanî berdî Şaxê Domanan.”

 Maya domanan Akaline dewam de zî vatibi ke Şaxê Domanan de domananê xo dir pêvînayîş kerdo û bi çimanê xo dîyo ke domananê aye rê îşkence ameyo kerdene.