Tedayê vera HDPyî zêdîyenê. Dewaya qefilnayîşî û blokekerdişê hesabê xezîna reyde, ajanîye zî endam û îdarekaranê HDPyî rê yena ferzkerdene. Îdarekaranê Rêxistina HDPyî ya Esenyurtî Hîcrane Yildiz û Muhammed Baranî vat ke polîsan înan rê ajanîye ferz kerda.

Muhammed Baranî ard ziwan ke verî polîsan pê telefonî venga ci da ke şoro qereqolî û dima polîsan reyna ci rê telefon kerd, vat ''Ma do derheqê kesêkî de to rê çîyêkî bipersê. Parka nêzdiyê keyeyê şima de ma pêvînayîş bikerê û to rê karêkî pêşnîyaz bikerê.''

Hîcrane Yildiz îfade kerd ke wexto ke nêweşxane ra vejîyaye polîsan venga ci da ke şora qereqolî la seba ke nêşîya reyna ci rê telefon kerd. Yildize da zanayene ke qereqol de polîsan a berda odaya TEMî û polîsan tira pers kerd ke reşa HDPyî senîn a, prosesê weçînayîşî de HDP do se bikero, paştî bido Îmamogluyî yan nê. Polîsan Hîcrane Yildiz rê pêşnîyazê ajanîye kerd la aye qebul nêkerd.

Muhammed Baranî dîyar kerd ke polîsan tede pê telefonî qisey kerd û ci rê pere teklîf kerd. Baranî pare kerd ke şewe û roje WhatsAppî ser o polîsan ci rê gefî wendî û ajanîye ferz kerda. Polîsan Baranî rê vato ke ê do domananê ey bikişê.

Wird îdarekaranê HDPyî vat ke polîsan deynê înan, rewşa înan a banka, têgêrayîşê înan zanayêne.