Caardişê keyfî yê îdareyanê zîndanî yê vera xoverdayoxanê grevê vêşanîye û rojeyê mergî yê ke bi mengan semedê wedartişê tecrîdê serê Rayberê Şarê Kurdî Abdullah Ocalanî  çalakîye de bî, dewam kenê.

Xoverdayoxanê rojeyê mergî ra Sena Efe ya ke Zîndanê Patnosî de ya bi telefonî keyeyê xo rê qalê çetinê ke xoverdayoxî dimayê çalakîye ancenê kerd. Efe ard ziwan ke rixmo ke nê newe çalakîya rojeyê megî ra vejîyayî wero hest dîyeno înan û wina dewam kerd: ‘’Dimayo ke rîye nêrehetîye ra ma waşt ke şirê servîsê acîlî mudirêk bihers vat ke şima senî dest bi grevê kerd wina zî biqedînê. Reaksîyonê embazan ra dima me berdî acîl.’’

Efe ard ziwan ke a pîya bi Bûrhan Şik, Faysal Atak û Şefîk Kayhan ê ke rojeyê mergî ra vejîyayî ameyî berdene bi acîl û va: ‘’Doktoran vat ke ê do serûm bidê ma. Ma bi saetan odeyêk de dayê pawetene. Fermandarê eskerî yê zîndanî  vernîya tedawîya ma girewt û ma peyser ardî koguşanê ma yê zîndanî. Îdareyê zîndanî  sey dişmenî nêzdîyê ma beno. Wazenê ke ma çalakîye ra dima seqet bimanê. Bitaybetî zî mudirê 1. Amet Ergun naye wazeno. Eke teber ra heyetêk mêro tîya, zextê  serê ma nêqedîyenê û beno ke hîna çîyêkê xirabî bêrê ma ser. Sazîyê heqê merdiman ganî na babete ser o vinderê.‘’

Sena Efe bale ante xoverdayîşê dayîkanê laçiksipîyan ser û qiseykerdişê xo wina qedîna: ‘’Ma dayîkanê xoverdayoxan bi heskerdiş û rêzdarî silam kenê û destê înan heminan bi hurmet maç kenê. Tecrîd ame şiktene la nêqedîya. Ma bi îradeyêkê xurtî Rayberîya xo rê giredaye yê û xoverdayîşê ma do heta peynî dewam bikero.’’