Parlementerê HDP’yî Alîcan Onluyî îdîaya cenazeyanê HPG’yijanê ke pêkewtişê Dêrsimî de cuya xo vînî kerda de şopê kîmyasalî estê kirişte Meclîsî, waşt ke Komîsyonê Heqanê Merdiman derheqê babete de wekinitiş bikero.
Parlementerê Partîya Şaran a Demokratîke (HDP) yê Dêrsimî Alîcan Onluyî îdîaya ke pêkewtişê qezaya Xozatî ya Dêrsimî yê tarîxê 22 û 23’ê Hezîran ê mabênê gerîlayanê HPG’yijan û leşkeran de kîmyasal ameyo şuxulnayene kirişt Meclîsî.
Onluyî waşt ke Serekîya Komîsyonê Wekinitişê Heqanê Merdiman derheqê îdîaya cenazeyanê Mahmût Alinbay, Cîhan Çelebî, Mazlûm Atar û Abdulkerîm Avrasî de şopê kîmyasalî ameyê dîyene de wekinitişan bikero û meqamanê selahîyetdaran rê hayî bido. Na çarçewa de seba ke Wezîrê Pawitişê Milîyî Hûlûsî Akar cewab bido yew pêşnîyaznameyê perse da.
Onluyî vat pîyê Mahmût Alinbayî Ahmet Alinbayî gama ke Tibê Edlîyî de cenazeyî teslîm girewtê cenazeya lajê ci û yê HPG’yijanê bînan bîyê sey komirî û çermê înan ameyê war û naye yew era fikrêno ke pêkewtişî de sîleho kîmyasal ameyo şuxulnayene. Pîyî Alinbayî vat cenazeyan rê îşkence zî ameyo kerdene, çimêkê lajê ci ameyo vetene, pol, çaq û didanê ci ameyê şikitene û tayê cayanê wucûdê ê de birîyayîşî estbîyê.
‘Tirkîya Sûc Kena’
Onluyî vat Tirkîya 13’ê Çele 1993 de ‘Peymana Qedexekerdişê Viraştiş, Berardiş, Pêserdayîş û Şuxulnayîşê Sîlehanê Kîmyasalan û Îmhakerdişê Înan’ 4’ê Nîsane 1997 qebûl kerda, ard vîrî ke welatê ken a peymane îmza kerda nêeşkenê sîlehanê kîmyasalan bişuxulnê. Onluyî vat eke nê sîlehî ameyê şuxulnayene Tirkîya sûc kerdo.
