Komeleya Heqanê Merdiman (ÎHD) 17’ê Temmuz a serra 1986’î de bi îmzaya 98 kesan awan bî. Vero ke komele awan bibo derbeya leşkerî ya 12’ê Êlule ya 1980’î virazîyaye. Zêdeyê 650 hezar kesî ameybî destbendkerdene, îşkence înan rê amebi kerdene û 173 kesî zî bi îşkence ameybî kiştene. Rojname, sendîka, komele, partîyê sîyasîyî ameybî girewtene, serekê pêroyî yê partîyanê sîyasî û parlamenterî ameybî destbendkerdene û înan ra tayê ameybî tepiştene. Zîndananê leşkerîyan ê halê nêaleladeyî de îşkence bi hezaran tepişteyan ameyêne kerdene û hemverê nê de grevê vêşanîye û rojeyê mergî kewtîbî rojdem. Xeylî tepişteyan mîyanê nê şertanê giranan de cuya xo vînî kerdebî.

Mîyanê ronayoxanê ÎHD’yî de merdimê tepişteyan, nûştox, rojnamekar, weşanger, akademîsyen, avûkat, dadger, mîmar, muhendîs û mamosteyî zî estbî. ÎHD’yo ke kewt serra xo ya 33’ine gama ke awan bi ra nata serkêşîya mucadeleyê heqî kerde. Binpaykerdişê heqanê merdiman ê Tirkîya ramotî.

Sereka ÎHD’yî ya Stenbolî Gulseren Yolerî vat ke mucadeleyê înan ê 33 serrî dewam keno û do tîya tepîya zî dewam bikero.

Yolerî vat ke ganî keyeyê ÎHD’yî bêro hîrakerdene û vat, “Ganî pawitoxê heqanê merdiman bi xurtî mucadeleyê xo bidomnê. Bêguman heqê merdiman tena karê Komeleya Heqanê Merdiman nêyo, labelê ma na babete de wayîrê cayêkê nêagêrayeyî de yê. Rayîrê ma derg o û çetin o, çunke faşîzm bi rayîr û metodanê cîyayan dest dayo serê cuya ma. Ma serra 33’ine ya ÎHD’yî de yê û bi wesîleya na serrgêre ma reyna seba xurtbîyayîşê komeleya xo veng danê her kesî; merdimî eşkenê bibê endamê komeleya ma, endamê komîsyonan û heman wextî de bê ke bibê endam zî eşkenê sey aktîvîstan bixebetîyê.”