Rojhelatê Kurdîstanî û Îran de çalakîyê şarî dewam kenê.

Şaritanê Sine yê Rojhelatî de xeylêk kesan bi rayraşîyayîşê ver bi Koyê Awyarî vera cezayanê îdamî nêrazîbîyayîşê xo mojna.

Vizêr şaristanê Newşehirî yê Îranî de cezaya îdamî dîyaye 3 kesanê bînan. Heta nika 112 çalakîkeran rê cezaya îdamî dîyaye û derheqê 4 kesan de cezaya îdamî ameye caardene.

Vizêr Ciwanro, Dîwandere û Sine de xeylêk çalakîkerî ameyî destbendkerdene.

Qiseykerdişê Lîderê Dînî yê Îranî Alî Hamneyî ra dima tedayê vera cinîyan zêdîyî. La hema zî seba wedaritişê qedexeyê laçikan israrî dewam kenê. 

Serewedaritişê 'jin, jiyan, azadî' ra nata 74 rojnamegerî ameyî tepiştene û ê zîndanan de binê teda û şertananê giranan de yê.