Namzetanê Îstanbulî yê Partîya Çep a Keske ra Kezbane Konukçu Koka ke wexto ke mamosta bibî pê KHKyan wezîfe ra ameye girewtene, têkoşînê kede daye. Koke derheqê xebatanê înan ê weçînayîşî de ANFyî rê qisey kerd.

Koke vist vîrî ke weçînayîşanê 7ê hezîrane ra dima HDP tim bîyo hedefê îqtîdarî. Koke ard ziwan ke Partîya Çep a Keske seba şarê azadîgîrî alternatîf a û vat: ''Şarê ma Îstanbul de ma zerrî ra qebul keno. Partîya ma pê rêxistinîya xo ya tradîsyonele zanîyena. Ma pê xo bawer ê. Ma bi xebatêka xurte do ser bikewê. Ma xebatanê xo de tewr zaf hewceyê ciwanan ê. Ma babetanê bêkarîye, ronîyayîşê ameyoxî, ekolojî ûsn. de ciwanan de têkilîye virazenê. ''

Koke îfade kerd ke ê dûştê betalkerdişê Peymana Îstanbulî yê û wazenê cuya cinîyan bigêrê binê garantî. Koke vat: ''Cinîyî zayê têkoşînê ma de hîna zaf mîyanê komelî de asenê. Seba ke cinîyî hîna zaf vengê xo vejenê, nê cînayetê cinîyan zî zêdîyayî. Partîya ma vera cînayetanê cinîyan xebatanê cidîyan kena. Ma çarçewa têkoşînê cinîyan de rêxistinbîyayîşê xoserî rê giranîye danê. Ma pê têkoşîn û hêzê rêxistinkerdişî yê cinîyan bawer ê.''

Koke da zanayene ke Îtîfaqê Kede û Azadîye îradeyê pîyaciwîyayîşî vejeno werte û vat: ''Hedefê ma yo verên rijnayîşê rejîmê Qesre yo. La no zî qîm nêkeno; ma wazenê welatî bivurnê. Ma wazenê Îstanbul de tewr tay 20 wekîlîyan bivisnê destî. Ma pê ney bawer ê. Çunke kok û tradîsyonê ma zaf xurt ê.''