Mayanê Şemeyî hewteyê 700. ra nata nêeşkenê şorê Meydanê Galatasarayî de çalakîya xo ya hewtene bikerê. Mayanê Şemeyî muracatê Mehkemeya Qanûnê Bingeyî (AYM) kerd û AYMyî derheqê ablûqaya polîsan de bira ''betalkerdişê heqî'' daye. Rixmê na bire zî Mayê Şemeyî ewro wextê çalakîye de hetê polîsan ra gêrîyayî binê ablûqa. Polîsan destûr nêda ke mayî çalakîya xo bikerê.

Mayanê Şemeyî û pawitoxanê heqanê merdiman rixmê astengîya polîsan zî eşkerayîye daye. Polîsan nêmeyê eşkerayîye de hêrişê çalakîye kerd. Mayanê Haştîye û pawitoxanê heqanê merdiman bira AYMyî viste vîrî la rixmê ney zî polîsan may û çalakîkerî destbend kerdî.

Hemsereka Pêroyî ya Komeleya Heqanê Merdiman (ÎHD) Erene Keskîn, Hemsereka ÎHDyî ya Îstanbulî Gulserene Yolerî û Mayê Şemeyî zî tede 15 kesî ameyî ameyî destbendkerdene.

Nameyê tay destbendkerdeyan wina yê: Erene Keskîn, Gulserene Yolerî, Hanîfe Yildiz, Masîde Ocak, Îrfan Bîlgîn, Mîkaîl Kirbayir, Lemane Yurtsever, Ayşe Tepe, Sebla Arcan, Îkbale Eren, Besna Tosun.

Dormeyê Meydanê Galatasarayî de ablûqaya polîsan dewam kena.