Organîzasyonê Pawitişê Destûrê Bingeyênî yê Eyaletê NRW’yî yê Almanya ke sazîya îstîxbaratî yê eyaletî ya raporê xo yê serra 2018’î eşkera kerd.

Rapor de ke hetê Wezîrê Karanê Zereyî yê NRW’yî Herbert Reulî ra ame eşkerakerdene de, ercnayîşê derheqê organîzasyonê îstîxbaratê Tirk û MÎT’î û rejîmê Erdoganî bale ancenê. Rapor de ame pêhesnayene ke NRW merkezanê dîasporaya Tirkan ra yew o û naye ra zî seba îstîxbaratê Tirkî cayanê muhîman ê operasyonan ra yew o.

Goreyê raporî eyaletê NRW’yî de xebatê PKK, DHKP-C û MLKP’yî estê û ame vatene ke hukmato Tirk muxalifê ke Almanya de yê sey ‘terorîst’ vîneno. Rapor de ame pêhesnayene ke NRW de xebatêka pîle ya ajanîye ya îstîxbaratê Tirkî esta.

Rapor de ame vatene ke îqtîdarê AKP’yî seba ke hemwelatijanê Tirkan ê eyaletî rê tesîr bikero medya, camîyanê DÎTÎB’î û sazîya xo ya lobîye ya UID’î şuxulnena û ame vatene ke MÎT bi hawayêkê îndîrektî nê karî de yo. Raporê îstîxbaratî yê NRW’yî de ame vatene ke Federasyonê Komeleyanê Tirkan ê Demokratîkan ê Almanya (ADUTDF) ke pabesteyê MHP’yî yo û organîzasyonê bi nameyê Mîllî Goruşî serra 2018’î ra nata yenê şopnayene.

Rapor de ame vîrvistene, dimayo ke MHP’yî Tirkîya de AKP’yî dir tîfaq viraşt grûbê neteweperestî yê Tirkî yê ke Almanya de yê bîyî hetgêrê Erdoganî û ame vatene, “Rîyê têgêrayîşê neteweperestî yê Tirkanê Almanya ra heyranîya seba Erdoganî bîye vêşî.” 

Raporê Organîzasyonê Pawitişê Destûrê Bingeyênî yê serra 2018’î ya seba hemeyê wareyê federalî de, reya ewilêne sernameyêko cîya seba karanê MÎT’î amebi amadekerdene. Rapor de amebi vatene ke MÎT kîşta xebata ajanîye ya hemverê kesanê ke Tirkîya ra ameyê, kena ke serê kesanê ke Tirkîya ra ameyê Almanya bikero û îradeyê sîyasîyî yê Almanî ser o tesîr bikero.