Koordînasyonê Krîzî yê KESKî ra Şenol Koksalî derheqê erdlerzê gird ê Kurdistanî de ANFyî rê qisey kerd.”

Koksalî ard ziwan ke KESK herême de bi koordîne xebitêno û vat, ‘‘Ma munaqeşe kerd ke ma eşkenê se bikerê û dima ma qerar da ke, ma çadiran bierşawê herême. Dewlete tay çadîrî dayî la qîm nêkenê ma xebetêka bi koordîne daye rayberdene û masayê krîzî dayî roneyene. Dima ma xo resna hêzanê ked û demokrasîyî û odayanê meslekan û sendikayan.’’

Koksalî dîyar kerd ke, înan verê AFADî reyde protokolêk îmza kerda û goreyê nê protokolî gere herême de pîya bixebitîyayêne la AFAD nêverdano ke ê pîya bixebitîyê û vat, ‘‘Ma Wezaretê Karê Zereyî rê nuşt; ma vat, ma wazenê herêmanê erdlerzî de beşdarê xebatan bibê ke wa heme xebatî bi koordîne bêrê kerdene. La hema zî cewabêk nêdîyayo ma rê. Protokolo ke ma AFADî reyde viraşto, gere pîya ma bi koordîne bixebitîyayêne û AFAD ameybî ma pêroyînan perwerde kerdbî la dima no çî nêbî.’’

Koksalî da zanayene ke erdlerzê 17ê tebaxe ra qet dersêk nêameyo girewtene û vat, ‘‘Eke no erdlerz nêbîyêne meclîsî de do munaqeşeyê efê îmarî biameyêne kerdene. Nê awanîyê ke nika rijîyayê do bîbîyêne wayîrê rûhsatî’’