Partîya Çep a Keske namzedê xo yê vîjnayîşê  14ê gulane dayî naskerdene. Kombîyayîşo ke Odayê Muhendîsanê Înşaatî yê Anqara de ame kerdene Hemserekê Pêroyî yê Partîya Çep a Keske Çîgdeme Kiliçgun Açar û Îbrahîm Akin, Hemserekê Pêroyî yê HDPyî Pervîne Buldan û Mîthat Sancar, Hemsereka Pêroyî ya DBPyî Salîha Aydenîz û temsîlkarê partîyanê Îtîfaqê Kede û Azadîye û temsîlkarê rêxistinanê komelî sîvîlî tewrê ci bîyî.

Kombîyayîş de deyîra vîjnayîşî ya ke hetê grûba rapî Kejoo, Reqso û Roni Artinî seme Meclîsê Ciwanan ê  Partîya Çep a Keske ameye amadekerdene, dîyaye naskerdene.

Mîthat Sancarî ke tîya qisey kerd vat: "Ma rixmê heme zextan û her qeyde kayan, tîya sereberz payra yê. Wa no heme zaliman rê bibo derd. " Sancarî wina dewam kerd: "Ma pê xoverdayîşî û bedelanê girdan heta ewro ameyî. Ma heme hermayanê xo ke pê bedalanê girdan no mîras marê  verda, bi heskerdiş û huremwtî selam kenê. Emanatê şima destê şarî de yo.  Wa paştê şima pêt bo, şikê şima çînêbo. Rojê azadî nêzdî yê. Tradîsyon û hêzê xoverdayîşî zerrîya hîkayeya ma ya. Xora her kes nê zano. Ma rayraşîyayîşê xo gird kenê. Nameyê nê rayîrî, rayîrê hîrêyîn o. Wextê bewlîkerdişê namzedan rehet nîyo. Çîyo ke destê ma ra ame, ma kerd. Kêmayîyê ma est ê. Beno ke şar heme namzedan ra razî mebo. Pê girdkerdişê xoverdayîşî ma eşkenê kêmayîyan werte ra wedarê. Ma hinda muneqeşeyê namzedan caverdê û biewnî verê xo ra. Ma hêzê xo kenê yew, dahîna benê gird û bi temsîlîyetê girdî kewnê palamentoyî. Ma do nê sîstemî bibedilnê û ameyoxî ronê. "

Çîgdeme Kiliçgun Uçar zî kirmackî tewrbîyayoxî silam kerdî û vat: "Rayîrê ma rayîrê hîrêyin o. Ma di îtîfaqî nayî ro ke semedê Tirkîya û Kurdîstanî zaf muhîm ê. Îtîfaqê Kede û Azadîye û Îtîfaqê Demokrasî û Azadîye yê Kurdan. Ma pê hêzê vizêrî ewro dahîna hêzdar ê. Semedê bedilnayîşî ma kewtî rayîr. Ma pê bawer ê ke ma do ser bikewê. "

Îbrahîm Akinî zî vat: "Îqtîdar seba ke vîn mekero do heme kayan kay bikero. La hinda peynîya nê rejîmî ameya. Ma do welatî nê xirabîye ra bixelisnê. Ma soz danê ke ma do nê welatî nê îqtîdarî ra bixelisnê ke têna şer keno. Ma do miheqeq ser bikewê. "

Pervîne Buldan zî vat: "Ma rixmê heme zextan vera nê îqtîdarî peyser game nêeşte, milê xo çewt nêkerd û ma sond wanenê ke ma do ewro ra tepîya zî ma do çirey verê AKPyî de çok medê. Bi serran ma ameyî înkarkerdene, çîn hesibnayene, ziwanê ma çîn hesibîya, kulturê ma ame înkarkerdene, nasnameyê ma çîn hesibîya. Embazê ma rîyê têkoşînî ra ameyî qetilkerdene, sugunkerdene û tepiştene. La ma nê zî zanê ke têkoşînî ra wet yewna rayîrê ma çîn o. "

Badê qiseykerdişan wekîlê dewrê 27ine vejîyayî sehne ser û dima namzedê Partîya Çep a Keske yê 81 bajarn dîyayî naskerdene.