Hemşaredarê Bajarê Pîlî yê Mêrdînî Ahmet Turk tewrê karê partîya xo ya Stenbolî bi û otêle de akademîsyen, ronşvîr û karsazan reyde ame têhet.

Mîyanê heyetê HDP’yî de Ahmet Turk, Parlamenterê Amedî Mûsa Farisogûllar, endamê Meclîsê Partîye, Dayîkê Aşitîye û rayberê partîye bîyî.

Turkî bale ante serê rewşa Kurdan û serebutanê peyênan ê Rojakewtenan Mîyanêne û vat, “Ganî ma heme bivînenê ke heta  demokrasî nêro ma do nêeşkenê bi asanî hezazê Rojakewtenan Mîyanêne ra xilas bibê. Seba naye zî tekoşînê ma têkoşînê demokrasî yo.”

Turkî da zanayene, sebebê bingeyên o ke HDP serê payan de vindeno o yo ke hêzê xo şarî ra gêno û ard ziwan, înan alternatîfêko hîrêyin nîşan dayo û no zî sey “Têgêrayîşêko ke hêzanê demokrasî yê Tirkîya gêno xo zere” name kerd.

Turkî ard ziwan ke, rayê weçînayoxanê Kurdan ê Stenbolî xeylî bimana yê û vat, “Seba ke rayê ma bimana bibê ma xebitîyenê. Ma cehd kenê ke rayê ma tesîr bi netîceyî bikerê.”

Turkî vat, “Seba naye zî nê weçînayîşî de ma hetê demokrasî yê. Ma vera zulmî vejîyenê. Ma rengê xo mojnenê. Vera ferseto ke Kurdan fam nêkeno, Kurdan sey dişmen vîneno ma cehd kenê ke peyamêk nîşan bidê.”

Turkî da zanayene, tercîhê şarê Kurdî do demokrasî bibo û vat, “Ge-gane wextêko kilm de berê bedilîyayîş a benê û na babete de gamî yenê eştene. Ma mecbûr ê ke nê prosesan teqîp bikerê. Ma do teyna temaşe nêkerê. Ma do tewrê ci bibê. Sîyasetmedarî do yan ney qebûl bikerê yan zî bikewê rewşêka winayêne ke nêeşkayê Tirkîya îdarê bikerê.”