Aktîvîsto kurd Amed seba ke zîndanê Almanya de vera zextan çok nêda û wayîrê ercanê xo vejîya do zîndanî ra pey zî bêro cezakerdene. Mehkemeya Hamburgî qerar da ke o do kelemçeyê bielektrîkî pa bikero û aktvîteyê polîtîkî ci rê qedexe kerdî.
Mustafa Çelîko çewlîgij (Amed) yo ke rîyê aktîvîteyanê sîyasîyan ra bajarê Bremenî yê Almanya de zîndan de yo badê cezaya di serran û hewt aşman do 5ê tebaxe de zîndanî ra vejîyo. Seba ke Amedî zîndan de vera zextan çok nêda û wayîrê ercanê xo vejîya do badê zîndanî ra vejîyayîşî zî bêro cezakerdene.
Goreyê Mehkemeya Berze ya Hamburgî Amedî cezaya ke heq kerda nêanta, coka do cezaya ey teber de zî dewam bikero. Mehkeme qerar girewt ke Amed do badê veradayîşî hendê panc serran bêro kontrolkerdene. Goreyê naye;
-Ganî bajarê Bremenî ra mevejîyo
-Ganî nêşiro komeleyanê kurdan
-Ganî qet tewrê kombîyayîşan mebo, endamê partî û dezgehanê sey PKK û KCDK-E û dezgehanê bînan ê ke paştî danê şarî kurdî mebo.
-Ganî tim telefono bêînternetî xo ser bikerişo
-Ganî kelemçeyê bielektrîkî pabikero.
-Ganî kontrolê keyeyê xo qebul bikero
-Ganî di hewteyan de rayêke rapor bido polîsan
-Eke adres û karê ci bibedilîyo ganî xebere bido ofîsê kontrolî
-Ganî heme şertanê serbestîya kontrolkerdîye bîyaro ca
Goreyê heyetê mehkeme Amed zîndan de kerdişanê xo ra poşman nêbîyo, tewirê xo yo sîyasîyî ra peyser game nêeşta û entegre nêbîyo. Beno ke badê veradayîşî hêna semedê PKKyî bixebito. Coka ganî o bêro kontrolkerdene.
