Çeteyo bi nameyê Mûhammed Amer Abdulkadîro ke Almanya ra şibi Sûrîye û tewrê çeteyanê DAÎŞ’î bibi xeberdara ANF’yî ya Rojawan û Vakurê Sûrîye Berîtan Sarya rê qisey kerdibi. Çeteyî vatibi ke birîndarê giranî yê DAÎŞ’î bi ambûlansan berê sînorî yê fermîyî ra benê Tirkîya û yenê tedawîkerdene, heman wextî de derheqê sazîya paravane ya bi nameyê “Helfen in Not” (Hetkarîya Lezgîne) a ke xo Almanya de organîze kerdo hayîdarîyê muhîmî dabî.

Çeteyî têkilîya mabênê wayîrê sazîya “Helfen in Notî” Bekîr Asturkî û wezîfedaranê dewleta Tirkî û çeteyanê DAÎŞ’î rayapêroyîye rê eşkera kerdebî. Bekîr Astruk kesêko sereke yê têkilîyanê DAÎŞ’î yê Almanya yo, na yewe ra zî hetê îstîxbarat û medyaya Almanan ra nizd ra ameyêne naskerdene. Labelê îstîxbaratê Almanî yo ke bi têgêrayîşanê şorişgêran ê Kurdistanij, Tirkîyayijan dir û çepgêr û sosyalîstan dir meşgul beno, Asturk û çeteyê bînî tena temaşe kerdêne ken ê kesan ambûlans û malzemeyê leşkerîyî Almanya ra şirawitêne.

Asturk xusûsen verê roşanê Qurbanan Facebook de hayîdarîyê derheqê hesabê xo yê bankaya Îş Bankasi ya Şaxê Edîrneyî pare keno bi hawayêkê teberê qanûnî hetkarî arê dano.

Facebooko ke bi mazeretê beyraqê YPG/YPJ û PYD’yî dayê hesabanê şuxulnayoxan gêno, şuxulnayîşê hîsanê dînîyan û arêdayîşê pereyan ê seba çeteyan ê Asturkî nêdîyayîşî ra yeno. Yewîyê hakimîye û asayîşî yê Almanan zî bi heman hawayî hemverê çeteyê Asturkî de bi bêxemî têgêrenê.

Goreyê wekendişê ANF’yî teberê ‘Helfen in Not’î de xeylî sazîyê bi nameyê ‘sazîya hetkarîye’ estê ke seba hetkarîya lojîstîkî bidê çeteyanê DAÎŞ’î Almanya de ameyê awankerdene. Teberê ‘Helfen in Not’î de çend sazîyê bînî yê ke vejênê vernî nê yê:

Help 4 Ummah, World Wide Resistance Help, Medizin mit Herz û Al Asraa Basaar. Merkezê nînan zî zafane eyaletê NRW’yî yê Almanya yo ke nufûsa koçberan tede vêşî ya. Nê sazîyî bi nameyê ‘zekat’, ‘qurban’ û ‘fitre’ pereyan arê danê û çeteyan rê şirawenê.