Vizêr merkezê ci Anqara 14 şaristanan de operasyonê qirkerdişê sîyasî ameyî kerdene. Sîyasetmedarî, pawitoxê heqanê merdiman, têkoşînêrê kede û demokrasîyî ameyî destbednkerdene. Operasyonî Anqara, Îstanbul û Wanî de ameyî protestokerdene.

Anqara

Şubeyê Komeleya Heqanê Merdiman (ÎHD) yê Anqara derheqê destbendkerdişan de Yewîya Mulkîyeyijan de kombîyayîşê çapemenîye kerd. Wekîla HDPyî ya Anqara Fîlîze Kerestecîoglu, Nuştox Fîkret Başkaya, Şaîr Ahmet Tellî û Nuştox-Rojnameher Huseyîn Aykol û zaf temsîlkarê sendîkayan, partîyan û dezgehan tewrê kombîyayîşî bîyî. Endama Şubeyê Anqara yê ÎHDyî Sevîle Turgut qisey kerd û vat: "Derheqê destbendkerdişan de avûkatî nênê zanayîşdayene. Armancê nê operasyonan komelî de tersayîş vilakerdiş û qesawetî zêdekerdiş o. Êyê ke yenê veradayene bi kontrolê edlî yenê veradayene û heqê înan ê vejîyayîşê welatê teberî û îmza yenê qedexekerdene. 450 hezarî ra zêdêr kesî mîyanê na rewşe de yê." Fîlîze Kerestecîoglu vat: "Bi destbendkerdişan kenê ke ma bitersnê. La seba ke ma nêtersenê eke ma ewro pîya yê."

Îstanbul

Endamanê Platformê Şubeyanê Îstanbulî yê KESKî zî Taksîmî de Şubeyê Zanîngehan ê 6. ê Egitim-Senî de bi beyanatêkî vera destbendkerdişan nêrazîbîyayîşê xo mojna. Beyanat hetê Hemsereka Şubeyê Şîşlîyî ya SESî Ferdane Çakir ra ame kerdene. Çakire îfade kerd ke îqtîdar bi destbendkerdişan wazeno ke vengê muxalefetî bibirno û rayaumûmîye bitersno.

Wan

Destbendkerdişî Wanî de zî ameyî protestokerdene. Hemsereka Şubeyê Wanî ya SESî Sezere Orenç bînaya şubeyî de beyanatêk kerd û pare kerd ke eleqayê nê pêro destbendkerdişan bi beynatê çapemenîye bi nameyê ''Alaya Sipîye'' esto ke 12 sibata 2016î de Cehdeyê Sakarya Anqara de ame kerdene.

Orençe bale ante ser ke o çax sere de Cizîr zaf şaristan û qezayan de seba ke ganê sivîlan binê tehlûkeyî de bibî vengdayîşê hetkarîye ame kerdene. Orençe vat: "Bi rojan, hewteyan, mengan bi qedexekerdişê vejîyayîşê teberî ganê merdiman amebî peygoşkerdene. "