Hemserekê Partîya Herêmanê Demokratîkan (DBP) Mehmet Arslanî derheqê mesajanê Rayberê Şarê Kurdî Abdullah Ocalanî de ANF’yî rê qisey kerd.

Arslanî xoverdayîşê grevê vêşanîye yê 200 rojan o ke semedê şiknayîşê tecrîdê serê Ocalanî ame viraştene vist vîrî û va: ‘’No xoverdayîşêko bi biheybet û bianor bi. AKP tim vera Kurdan polîtîya hêrişkare dano domnayene û wazeno ke şexsê Birêz Ocalanî de sîyasetê Kurdan bifatisno û vernîya Kurdan bîgêro. Tesîrê Birêz Ocalanî ê serê sîyasetê Tirkîya û bitaybetî zî serê Kurdan yeno zanayene. Bi tecrîdî wazenê ke sîyasetê demokratîkî yê Tirkîya rê mudaxale bikerê. Hukmat tim serê Birêz Ocalanî ra polîtîya şantajî bica ano.  Bi sebebo ke sîyaset û şarê Kurdî vera naye tewirêko mende ranêmojnenê hukmat zî naye ra paştî gêno. Eke ma rolê xo raşt kay bikerê ma eşkenê nêzdêbîyayîşê hukmatî yê vera Birêz Ocalanî bibedilnê.’’

Paradîgma û Mantikê Çareserîye yê Ocalanî

Arslanî bale ante mucadeleyê demokratîkbîyayîşî yê Ocalanî ser û va: ‘’Birêz Ocalan serra 1993’î ra nata semedê çareserkerdişêkê demokratîkî yê meseleyê Kurdî têgêreno. Birêz Ocalan çirey zî meseleyê Kurdî goreyê herême nêgirewt dest. Seba ke Kurdî her  ca de heqanê xo yê sîyasî û kulturkî dest bifînî mesele zaf bihet girewt dest. Coka bi hedefê welatanê herême. Ewro zî rixmo ke şertanê zehmatan de yo û newe binê tecrîdê xorî û dergî ra vejîyayo, firsendê verênî  de berpisîyarîye û wezîfedarî yê dewlete û sîyasetê Kurdî fîneno înan vîrî. Paradîgma û mantikê çareserîye yê Birêz Ocalanî  berpirsîyarî û wezîfeyê cimat û dewlete yewbînan ra ciya keno. Veng dano dewlete û sîyasetê Kurdî û wazeno ke her kes wezîfeyê xo bica bîyaro. Polîtîkayê pêkewtiş û înkarî nê problemî çareser nêkenê. Birêz Ocalano ke îqtîdarî rexnê keno Kurdan rê wina vano; ‘’Eke şima vera dewlete mucadele kenê, eke dewlete demokratîk nêya, şima ganî demokratîk bê. Şaredarîye ke şima vistî dest de ganî îdareyê azad û seypêyî esas bêrê girewtene .’’

Meseleyê Çar Perçeyanê Kurdistanî Pabesteyê Yewbînan ê

Arslanî wina dewam kerd: ‘’Nêzdîbîyayîşê Birêz Ocalanî ê îdareyanê herêmîyan, Rojawan û sîyasetê Tirkîya heme pabesteyê yewbînan ê. Birêz Ocalan nê problemi zaf hîra gêno dest û meseleyê Kurdî de qet yew perçeyî  yewbînî ra cîya nêkeno. Mesleyê çar perçeyan zî yewbînan ser o tesîr kenê û yewbînan weye kenê. Seba ke AKP heta ewro semedê Kurdan çîyêk nêkerd û vera Kurdan polîtîkya hêrişkare dana domanyene ewro Kurdî vera înan raye xo  şuxulnayî. Ganî hukmat naye ra dersêk vejo û goreyê naye têbigêro. Reyna CHP zî ganî mesajê hamleya stratejîke ya Kurdan raşt fam bikero û berpirsîyarî ya xo bica bîyaro.’’

Kurdan bi Hemleya Stratejîke Serkewtişo Psîkolîjîk Fîna Dest

Arslanî bale ante muhîmîya rolê Ocalanî ser û qiseykerdişê xo wina qedîna: ’’Eke rayêk vînayîşê  Birêz Ocalanî sîyasetê Tirkîya wina rehet keno, ganî îqtîdar vernîya ey abikero   û heyetî sîyasîyî û dezgehê cimatê sivîlî zî ey dir pêvînayîşan virazê. Bi hamleya stratejîke serkewtişo psîkolojik kewtê destê Kurdan. Her kesî dî ke heta ke Kurdî nêrê hesabkerdene siyaset nêno kerdene. Ganî nika pozîsyonê ma yo ke sîyasetê Tirkîya bewlî keno bibo. Goreyê ma vernîya demokratîkbîyayîşê Tirkîya de problemo tewr gird meseleyê Kurdî yo. HDP ewro ra tepîya ganî  naye bikero rojdemo verên û goreyê naye têbigêro.’’