Avûkatanê Ocalanî Newroz Ûysale, Mazlûm Dînç, Faîk Ozgur Erol û Cengîz Yureklî seba ke bieşkê muwekîlê bivînê, muracatê Serdozgerîya Komare ya Bûrsa kerd.

Avûkatanê Ocalanî rê dimayê 8 serran 2'ê Gulane de destûr ame dayene ke muwekîlê xo reyde pêvînayîş bikerê. Reya tewr peyêne 22'ê Gulane de Ocalanî reyde pêvînayîş amebi kerdene.

27’ê Temmuze ya 2011’î ra nata 810 muracatê avûkatan bi behaneyanê cîya cîyayan ameyî redkerdene.

Vernîya Ocalanî reyde pêvînayîşî avûkatan dimayê xoverdayîşê grevê vêşanîye yê bi menga amebî akerdene.

Mehkemeya Cezaya Giran a 1’ine ya Bursa, qedexeyê pêvînayîşê avûkatan ê Îmraliyî 17'ê Nîsane de wedarna.

Wezîrê Edaletî Abdulhamît Gulî zî 16'ê Gulane de eşkerayîye daye û da zanayene ke qerarê astengkerdişê pêvînayîşî ameyo wedaritene. Labelê çalakgeranê grevê vêşanîye û avûkatan waştîbî ke qerar pratîkî de bêro bicaardene.