HDPyî vera dewaya qefilnayîşî 19ê nîsana 2022yî de pawitişnameyê xo yê bi 220 rîpelî da Mehkemeya Qanûnê Bingeyî û pabeyê bire yo.

Hetkara  Hemserekanê HDPyî Ayşe Acar Başaran derheqê prosesê qefilnayîşî de û hêrişê 32 serran ê dewleta tirke yê vera têgêrayîşê sîyasî yê kurdan de ANFyî rê qisey kerd.

Ayşe Acar Başaran ard ziwan ke Tirkîya de caardişê sîyasetê demokratîkî bi sereyê xo karêko zaf zehmet o û vat: ''Eke şima xeta demokrasî ser de yê tim benê hedefî. Hukmatî vurîyayî zî demokraî qetî nêameye caardene. Ge ge averşîyayîşî qewimîyayî zî tim darbeyan verê ney girewt. Tirkîya welatêko winasên o ke tede sîyasetmedarî tepişîyenê, partîyî qefilîyenê. Çunke Tirkîya de meseleyî nênê qebulkerdene. Meseleya kurdan 100 serrî yo dewam kena. Xora partîyê ke ameybî qefilnayene zî mojnenê ke Tirkîya de qetî nêame waştene ke meseleya kurdan bi demokrasî bêra çareserkerdene. Seba ke meseleyê serê estbîyayîş û ziwanê kurdan nêvurîyayî tradîsyonê ma yê têkoşînî zî dewam keno.''

Başarane vist vîrî ke îqtîdarî verî zî soz dabi ke meseleya kurdan çareser bikero û şerî biqedîno la sozê xo nêard ca. Başarane vat: ''Erdoganî zî sey ê bînan wexto ke îqtîdar bibi soz dabi ke meseleya kurdan çareser bikero labelê wextêkê kilmî ra dima seba ke îqtîdarê xo mende bikero vat 'meseleya kurdan çin a.' Îqtîdarê ke meseleya kurdan çareser nêkerde, çin bîyî la têkoşînê kurdan dewam keno.''

Başarane bale ante tewirê komelî yê vera dewaya qefilnayîşî ser û vat: ''Cewabo tewr gird ê vera na dewa Newroze de ame dayene. Bi mîlyonan kesan pîya vat 'Ma tîya de yê.' Beno ke ê bieşkê sey bînayêke HDPyî kilîd bikerê labelê HDP fikrêk o ke herinda ci est a. Wexto ke Meclîsê Cinîyan ê HDPyî bi şîarê 'Xizanîye rê ney' şaristanan ra gêrayêne dî ke HDP seba komelî hêvîyêka pîl a. Coka qefilnayîşê HDPyî yeno manaya hêrişê vera komelî.

Ma her îxtîmalî ra amade yê. Se beno wa bibo ma do meverdê ke ê HDPyî biqefilnê. Vera nê pêroyan ma têkoşîn kenê ke HDPyî payan ser de verdê. Bêguman amadekarîyê ma seba her îxtîmalî est o. Key wextê ci bêro ma do şarî reyde nîqaş bikerê û gamanê hewceyan bierzê.''