Serekwekîla Grûba HDPyî Merale Daniş Beştaş derheqê rojdemî de Meclîs de kombîyayîşêkê çapemenîye kerd.

 Qiseykerdişê Beştaşe ra tay noqtayê girîngî wina yê:

''Îqtîdarê AKP-MHPyî zûran ser o ronîyayo. Ma do nê îqtîdarê zûrkerî bişawê. Hînî welatê Yewîya Ewropa zî zanenê ke no îqtîdar zûran keno. Îqtîdarê AKP-MHPyî nîjadperestîye û nefretî ser o polîtîkayan keno.  Almanya de wekîlê AKPyî nefret û nîjadperestîye ser o kampanyaya weçînayîşî keno.  Îqtîdarê AKP-MHPyî welatanê Ewropa de kurdan û muxalîfan tehdît kenê. Ma venga Almanya danê ke verê nê kerdişan tedbîranê xo bigêrê. Ganî rayaumûmîya Almanya zî kerdişanê îqtîdarê AKP-MHPyî ra hayîdar biba.  

 Dewaya qefilnayîşê partîya ma û dewaya Kobanê  dafikêka AKP-MHPyî ya. Îqtîdarê AKP-MHPyî, Erdogan û Bahçelî sey serekê mehkeme têgêrenê û fermanan danê warê muhakemekerdişî. Waştişê înan ser o bloke nîya hesabanê ma yê xazîne ser.  Nêno qebulkerdene ke pê qiseyanê şahîdanê nimiteyan hesabê ma bêrê blokekerdene.  Ma do cewabê na dafike 14ê gulane de bidê. Şarê ma do cewabê înan bido.''