Partîya Çep a Keske Parka Yogurtçuyî ya qezaya Kadikoyî ya Îstanbulî de, çarçewa xebatanê weçînayîşî de Şayîya Wisarî kerde. Hemsereka Pêroyî ya HDPyî Pervîne Buldan, Serekê EHPyî Hakan Ozturk û namzetê wekîlîye yê Partîya Çep a Keske beşdarê şayîye bîyî.

Şayîye de hêverî namzetê Îstanbulî dîyayî şinasnayene. Şayîye de verî namzete û Hemvervatoxa Meclîsê Ciwanan ê HDPyî Dêrsime Dag qisey kerd û vat: ''Partîya Çep a Keske do komara demokratîke awan bikera. AKP do şoro û cinîyî do bêrê.''

Dima hunermendê MKMyî Merwan Tan vejîya sehne ser. 

Hemsereka Pêroyî ya HDPyî Pervîne Buldan pê sipaskerdişî dest pê qiseykerdişê xo kerd. Pervîne Buldan pare kerd ke ê do ameyoxêkê azadî pêşkêşê şaran bikerê û vat: ''Partîya Çep a Keske vera faşîzmî û neheqîyan ha yena. Ma sey cinîyanê nê welatî seba ameyoxê xo, do welatî bivurnê. Ma sey cinîyan do nê îqtîdarî birijnê. Ma do bikerê ke b xurtî şorê Meclîsî. Ma armanc kenê ke tewr tay 100 wekîlan bişawê. Eke wina bibo qet yew qanûn  bê ma nêro tesdîqkerdene.

Tay kesî est ê ke sereyê merdiman têmîyan kenê. Ma sey îtîfaqî dekewenê weçînayîşan. Îtîfaqê Kede û Azadîye sere û çimanê ma ser o. Her raya ke herinda ma de bidîya partîyêka bîne, do şora AKPyî. Goş medê ê kesanê ke vanê 'qet yew ferqê ma bi partîyanê bînan çin o.' Tek adresê ma Partîya Çep a Keske yo. Sewbîna yew adresê ma çin o.''