Hemsereka Pêroyî ya Partîya Demokratîke ya Şaran (HDP) Pervîne Buldan derheqê astengkerdişê hetkarîya partîya ci yê Bazarcixî de Amed de kombîyayîşê çapemenîye kerd. Hemserekê Kongreya Komelê Demokratîkî (KCD) Berdan Ozturk  û wekîlê HDPyî zî tewrê kombîyayîşî bîyî.

Pervîne Buldan ard ziwan ke ê semedê qewimîyayîşê dewa Hasankoca ya Bazarcixî ameyî pêser û vat: ''Dewa Hasankocayî ya Bazarcixî de des rojî yo embazê ma yê partîyijî, zerrîwazî bi ruhê paştîdayîşî embarêkê girdî de malzemeyê tiran veng kenê û resnenê şarî. Goreyê xebera ke çend saetî verî resaye ma, qeyûmê Bazarcixî, qeymeqam û amîranê mulkî eşto na bîna ser û embazanê ma ra vat şima tîya teslîmê ma kenê, ma vila kenê. Embazê ma tehdît kerdî, vat eke şima teslîmê ma mekerê ma do şima pêrune destbend bikerê. No zîhnîyet bi serran o dewam keno. No zîhnîyetê qeyûmî yo.''

Buldane bale ante ser ke yeno waştene kampanyaya hetkarî ya HDPyî bêro vindarnayene û wina dewam kerd: ''Êyê ke destpêkerdişê erdlerzî ra, bitaybetî zî roja verêne meydan de nêbî, qet hetkarî nêrasnayî şarê ma, nika kenê ke verê hetkarî bigêrê û kampanaya HDPyî vindarnê. Ez wazena veng bidê îqtîdarî. Hîş şima sere de nêmanda. Merdimî vêşanî ra, serdî ra, erdlerzî ra felaketa girde ciwîyene. Wextê winayên de astengkerdişê hetkarî hedê qet çewî nîyo. Qet heqê çewî zî çîn o.

Bedelê ci çi beno wa bibo, ma do heme hetkarîya ke resaya ma, biresnê şarî. Ez tîya ra veng dana rayapêroyîye. Ma qerqilîyenê ke ewro ra tepîye averşîyayîşê winayên bibê. Beno ke verê heme hetkarî bêro girewtene. Îqtîdar keno ke hetkarîya HDP, dezgehanê sîvîlan ê komelî û partîyanê bînan sey hetkarîya ramojno. Ma do çirey destûrê nê medê.''

Pervîne Buldan vat: ''Goreyê zanayîşanê ke ma girewtî, nika ûca leşkerê xo cakerdî. Di rojê verênî yê erdlerzî de hukMat û leşKerî ûca çînêbî. Êyê ke semedê hetkarî nêameyî, semedê astengkerdişê hetkarî ameyî. Ma çîyê winayênî çirey qebul nêkenê. Bitaybetî zî tirê ke Sert û Êlihî ra komur û kolî ardêne, astenkerdişê înan û destsernayîşê AFADî, ma qetî qebul nêkenê. Tirê ke şîyî Dîlok hetê AFADî ra ameyî vindarnayene û înan dest nayo hetkarî ser. Eke no tewir bêro domnayene, hetkarî kêm beno.

Hîrê roj şar vêşanî, têşanî û serdî ra perîşan bi la şima ûca nêbî. HDP ûca bi, partîyê sîyasîyî yê bînî dezgehê komelê sîvîlî û zerrîwazî ûca bî. Ganî partîyê bînî  û her kes vera nê vejîyo. Roje roja paştîdayîşî ya, roja destê yewbînan tepiştişî ya. Roje roja  serûbinkerdişê APKyî ya. Zîhnîyetê ke şar binê xirban de, serdî de vêşan, têşan  verda, ma do vera nê zîhnîyetî her qeyde seferberîye bikerê.''