Hemsereka Pêroyî ya Partîya Şaran a Demokratîke (HDP) Pervîn Bûldane seba ke raya xo bida ameye Distana Mûrat Kolukî ya taxa Florya ya qezaya Bakirkoyî. Bûldane hetê endamanê Heyetê Rayberîya Merkezî ya HDP'yî, Parlamentera HDP'yî ya Stenbolî Zuleyha Gulume û Dayîyanê Haştîye ra ameye pêşwazîkerdene û raya xo daye.

Bûldane dimayê raydayîşî eşkerayîyêk vernîya dibistane de daye û vat, “Hêvî kena ke weçînayîşê 23'ê Hezîrane seba ameyoxê Tirkîya bixeyr bo. Hêvî kena ke rayê ke yenê dayene teyna qederê Stenbolî ney, qederê Tirkîya do bibedilnê. Rixmo ke amelîyat bîya zî ez ewro ameya mi raya xo daye û mi waşt nîşan bida ke rayêk çiqas muhîm a. Ma her timî vat, bi rayêk her çî eşkeno bêro bedilnayene. Bi eynî bawerîye ez ewro ameya ke raya xo bida. Stenbol do eynî wext de qederê Tirkîya zî bibedilno, coka mi raya xo daye. Werrekna rayê ke 31'ê Adare de ameyî dayene, îradeyo ke ame nîşandayene biameyêne qebûlkerdene ke ewro no weçînayîş nêameyêne kerdene. Rixmê her çîyî seba ke îradeyê şarî ame destsernayene ma reyêka bîne rayanê xo danê. Ez pê bawera ke ewro do sindoqe ra demokrasî bivejîyo. Ez hêvî kena ke ewro do sindoqan ra haştî, biratîye û azadîye bivejîyo. Weçînayîşê Stenbolî seba ma hemeyan bixeyr bo.”