Hemsereka Pêroyî ya HDP’yî Pervîn Bûldane pêvînayîşê Rayberê Şarê Kurdî Abdullah Ocalanî bi keye û avûkatanê ci yê ke girevê vêşanîye ra dima reyna ameyî destpêkerdene ANF’yî rê ercnayî.

Bûldane nê pêvînayîşî sey gamêka hole name kerdî û vat la no teyna nêvejeno. Semedê çareserkerdişê problemê Kurdî û akerdişê kanalanê sîyasetî ganî heyetê sîyasîyî şirê Îmrali.

Bûldana ke hemserê ci  Savaş Bûldan 3’ê Hezîran a1994’î de binê nezarat de ame qetilkerdene vist vîrî ke a polîtîkaya qirkerdişê vera Kurdan nizdî ra nas kena  û ard ziwan ke 25 serrî yo derheqê heqanê merdiman de no welat de çîyêk nêbedilyayo.

Bûldana ke heyetê Îmraliyî de ca girewt ard ziwan ke kaos û krîzê ke welat ciwîyenê teyna bi çareserkedişê problemê Kurdî werte ra yenê wedartene û va: ’’Gama ke Birêz Ocalanî dir pêvînayîşî ameyêne viraştene, Tirkîya de demê bêpêkewtişî ame ciwîyayene. Gama ke berê Îmraliyî ame qefilnayene kaos û krîzan dest pêkerd.’’

Bûldane vist vîrî ke rayberîya Leyla Guvene de bi grevanê vêşanîye tecrîd ame şikitene û ard ziwan ke naye de rolê dayîkanê laçigpîyanê ke her tim verê zîndanan de çalakîye de bî zaf gird o.

Bûldane bale ante serê mesajanê Ocalanî û va: ‘’Birêz Ocalan mesajanê xo de vano ke semedê aşitîya cimatkî û werêameyîşî ganî vernîya sîyasetê demokrtatîkî abîyo.  Ganî mesajê Birêz Ocalanî raşt bêrê famkerdene. Teyna çalakgeranê grevê vêşanîye rê nê, heman wextî de dewlete û hukmatî rê zî mesaj esta. Na mesajê demokratîkkerdişê Tirkîya ya. Semedê naye zî ganî teyna avûkatî nê heyetê sîyasîyî zî şirê Îmrali.’’

Bûldane derheqê mesajê Ocalanî yê Sûrîya de zî vat xora gama ke ma Îmrali de pêvînayîşî viraştêne Sûrîya tim rojdemê ma de bî. Ocalanî vatêne, ‘Sûrîya xeta ma ya sûr a’ ez bawer kena ke ewro zî eynî nuqta de yo.

Bûldane vat: ’’Ganî Tirkîya de şarî demê aşitîye û muzakeran  biafernê. Ê ke aşitîye wazenê, akedemîsyen, nuştox, roşnvîrî ganî nê demî bidê destpêkerdene.’’

Bûldane peynîya qiseykerdişê xo de ard ziwan ke ê sey HDP’yî stratejîya xo ya weçînitişî nêbedilnaya û do 23’ê Hezîrane de reyna cayê demokrasî de ca bigêrê û AKP’yî rê bidê vîndîkerdene.