Rêxistina HDPyî ya Idirî kongreya xo ya 4. kena. Hemsereka Pêroyî ya HDPyî Pervîne Buldan kongre de qisey kerd.

Buldane bitaybetî derheqê muneqeşeyanê îttîfaqî û naMzedê serekkomarî ser o vindet û vat: ''Çimê perûne ma de yê. Vanê namzed venjenê ya nê? Paştî danê îttîfaqê mîletî ya nê? HDP stratejîya xo bedilneno ya zî hedefêkê ci est o?''

Buldane qiseykerdişê xo wina domna: ''Mi vizêr Qers de eşkerayîye daye. Mi vat  HDP do namzedê xo vejo û bi namzedê xo tewrê vîjnayîşî bibo.  HDP qey namzed mevejo? Ferqê HDPyî şima ra çîyo? HDP nê welatî de yew îrade nîyo?  HDP partîyêka sîyasîyî nîya? Ez reyna vana HDP do pîya bi îttîfaqanê xo namzedê xo vejo. Seba ke HDP pîya bi Îttîfaqê Kede û Azadîye, îttîfaqê cinîyan, îttîfaqê kurdan, îttîfaqê hêzanê demokrasî do namzedê xo vejo, xora xeyal tayînan xeripîyenê û stratejîya înan ê ameyoxî serûbin bena. 

Ez bitaybetî wazena nê vajî, êyê ke şarê kurdî û dostanê ci rê zîndanan û goristanan reva vînenê vînîkerdişî rê mehkum ê. Êyê ke kurdan sey îrade nêvînenî do tim vîn bikerê. Ez tîya ra reyna veng dana kurdan ke reya xo danê AKPyî. Biewnê zulmo ke vera kurdan û HDPyî keno,  hema ke şima reya xo nêdeya reyna bifikîrîyê. Yewîya kurdan her wextî ra zafêr muhîm a. Vera kurdan polîtîkaya şerî û tecrîdî yena rayraberdene. Ma vera şerî haştîye û vera tecrîdî dîyalogî wazenê. Ewro têna vera Birêz Ocalanî nê heme Tirkîya de tecrîd est o. Îqtîdaro ke qanûnê xo zî nas nêkeno sebebê tecrîdê Îmraliyî yo. Eke mesele kurdî bê heme partîyî seciye qerar genê. HDP semedê nê welatî yew firsat o. Têna partîya ma haştîye wazena. Sebeno wa bibo HDP do çirey vindetişê xo ra tevîz medo.''

Badê qiseykerdişan de vîjnayîş de Kader Oner û Avûkat Yaşar Kalmiş sey hemserekanê neweyan ê HDPyî yê Idirî ameyî vîjnayene.