Serekê CÎKî Hafiz Ahmet Turhalliyî dîyar kerd ke, dewleta tirke seba ke bieşkîya sucanê xo binimna, dînî ser o zuran kena û vat, ‘‘Ma pere, mal û mulkê xo seba ke biresnê merdûranê erdlerzî, gere teslîmê ê sîstemê firawûnî nêkerê. Seba ke ê dizd ê, heq û huqûqê însanan wenê. Xora sebeb ê yê ke encamê erdlerzî hende giran bîyî.’’

Derheqê xebitnayîşê dînî yê AKP-MHPyî de, ma Serekê CÎKî Hafiz Ahmet Turhalliyî ra persayî

Îqtîdarê tirke erdlerzî ra dima hewl dana ke bi vatişanê ‘îradeyê îlahî’ û ‘qeder’î berpirsîyarîya xo, xo ser ra bierza. Goreyê dînê Îslamî no yeno çi mane?

Vernîya her çîyî ez seba ê însanan ke erdlerzî de ganê xo dayo, Homayî ra rehmet wazena û birîndaran rê zî şîfa wazena. Homa sebir bido şarê ma.

Qedero ke Quran û Peyxember behs keno, zaf cîya yo. Homa vano ‘‘Mergê şima qeder o’’ la metodê mergî ma weçînenê. Afganîstan de demê ciwîyayîşî 50-65 serr o. Ewropa de 75-85, heta 90 zî şino. Oyo ke ney dîyar keno, şert û mercê cuy o. Sureyê Îsra de wina vajîyeno, ‘‘Ma qederê şima da destê şima.’’ reyna Sureya Şura de zî wina vajîyeno, ‘‘Her çîyo ke yeno şima ser, seba guneh, îhmal û kêmanîya şima ya.’’ yanî wexto ke şima bendawan virazenê, daran birnenê û her cayan kenê beton, xoza zî heyfê xo gêna. Eke ez şêra royî ver de banêkî biviraza, wexto ke laserî wirzîyayî do keye û gedeyanê mi xo reyde berê. Mi bi xo no qederê xo viraşt.’’

Çira ê wina vanê?

Çîyê ke înan kerdî, wazenê bikerê sucê şeytanî yan zî yê Homayî. No taktîkêkê serdastan o. Keso ke vano no qederê şima yo, çira bi hezaran pawitoxan û asayîşan û bi wesayîtanê zirxinan gêreno?

Gere Colemerg ra heta Kolnî şarê ma se bikero?

Dewleta tirke seba ke bieşkîya sucanê xo binimna, dînî ser o zuran kena û vat, ‘‘Ma pere, mal û mulkê xo seba ke biresnê merdûranê erdlerzî, gere teslîmê ê sîstemê firawûnî nêkerê. Seba ke ê dizd ê, heq û huqûqê însanan wenê. Xora sebeb ê yê ke encamê erdlerzî hende giran bîyî.

Bêrê ma pîya birînanê xo bipêşê

Seba mislimanan ferz o ke hetkarîya ê însanan bikerê ke hewcedarîya înan est a. Keso ke vano ez însan a zî, na perpirsyarîya înan est a. Welatperwer û dîndarê ma yê rastênî wayîrê nê çîyî vejîyayî. No ferz o. Ez eşkena ney vaja; zekatê kamî est bo gere bido mexdûranê erdlerzî, fitreya kamî est ba wa bida mexdûran. Bêrê ma destê yewbînan bitepîşê. Ma şarê xo muhtacê na dewleta zilmkare nêkerê. Ewropa ra 2-3 mîlyon kurdîstanijî est ê. înan ra her kes 10 euro bido zî, ma do bieşkîyê tîya newe ra bivirazê. Bêrê ma pîya birînanê xo bipêşê. Hewcedarîya ma bi dewlete çin a.