Cenazeyanê gerîlayanê ke operasyonanê leşkerîyan ê 16 menganê peyênan de koyanê Amanosan de cuya xo vînî kerda nênê naskerdene. Menga Adar a 2018’î ra nata nizdê 50 gerîlayê HPG’yî, bîyî hedefê Wasitayanê Hewayî yê Bêmerdiman ê Biçekan (SÎHA). Cenazeyê 17 kesanê ke cuya xo vînî kerda seba ke “nasnameyê înan nêameyê tespîtkerdene” nênê dayene bi keyeyanê înan.

Qintarê Koyanê Amanosan de tewr peynî 10’ê Temmuze de operasyon de Davût Acar û kesêk ke nameyê ci nêame zanayene cuya xo vînî kerde. Her di cenazeyî zî seba tespîtkerdişê nasnameyî û muameleyanê otopsîye ameyî berdene bi Sazîya Tibê Edlîyî (ATK) ya Edene. Dimayo ke keyeyê ci pêhesîya ke domanê înan cuya xo vînî kerda tavilî muracatê dozgerîye kerd. Ancax muameleyê teşhîsî yo ke bi tewrbîyayîşê dozgerî ame kerdene de keyeyî bi hawayêkê netî tespît nêkerd, naye ra nimûneyê DNA da. Eke cenazeyî mîyanê 15 rojan de nêrê teşhîskerdene do goristanê bêkesan de bêrê definkerdene.

Ame zanayene ke nika goristanê bêkesan ê Bûrûk û Asriyî de 7 cenazeyê ke nasnameyê înan nêameyê tespîtkerdene estê. Cenazeyê Acarî û 9 hebê bînan ê ke yewîya wucûdê înan xeylî xerepîyaya morgê ATK’yê Edene de yenê vindarnayene. Ame zanayene ke zafaneyê kesanê ke goristanê bêkesan de ameyê definkerdene û morgê ATK‘yî de yenê vindarnayene Rojawan û Rojakewtena Kurdistanî ray ê, seba ke keyeyan muracat nêkerdo testê DNA nêameyo kerdene. Tayê keyeyanê ke nimûneyê DNA dayo zî rixmo ke ser ra serrêk ravêrta zî seba ke netîceyê testan nêvejênê cewab nêno dayene.